Press Release Serchhip, the 2nd June, 2026

DISTRICT AIDS PREVENTION AND CONTROL COMMITTEE THUKHAWM; MOBILIZATION FOR AIDS SURAKSHA CHUNGCHANGA SERCHHIP DISTRICT ACTION PLAN ENHO A NI

Serchhip, the 2nd June, 2026: Vawiin khan Serchhip District AIDS Prevention and Control Committee chu an Chairman, Serchhip District Bawrhsap Pu Paul L. Khuma kaihhruainain an thukhawm a. He hunah hian ‘Mobilization for AIDS Suraksha’ chungchanga Serchhip District Action Plan siam chungchang sawi ho a ni.

Pu R. Lalhruaitluanga leh Dr. Alfred C. Lalhmingmuana, DISHA Lunglei-te chuan District Action Plan Presentation pein, ’95-95-99′ target-a Serchhip District dinhmunte an tarlang a. 95-95-99 hi HIV/AIDS dona kawnga bituk pawimawh tak niin A awmzia chu HIV hrik pai zinga 95% in inentirna hmanga an inhriat chhuah a, chung zinga 95% ten damdawi (ART) an ei a, damdawi ei zinga 99% ten an taksaa HIV hrikte an thunun (suppress) na tur a ni a. Serchhip District-ah Target 1st 95-ah HIV kai tih inhria 68.8% awmin, 2nd 95-ah ART hmanga Inenkawl hi 95% hnuailam niin, 3rd 99-ah (ART hmanag HIV hrik thunun) hi 95.9% te a ni a. Vawiin meeting-ah hian heng target-te hi tha zawka hlen a nih theih nan, Department hrang hrang te, YMA leh Village Council te thawh ho a pawimawh zia sawi lan niin District Action Plan bawhzuina kawnga an mawhphurhnate thlir ho a ni bawk.

He hunah hian Pi Lalruatfeli, Programme Officer, P&OCS CSS chuan District Community Resource Group (D-CRG) pawimawhzia sawiin, TE DISHA YRG Pu Peter Lalrinngheta’n ‘Breakfree Website’ chungchang a hrilhfiah a. He website-ah hian HIV/AIDS chungchanga mahni inbihchianna (self-assessment) te, testing tih dan leh tih theihna hmun te, leh ART Centre awmna hmun hrang hrang te a en vek theih a ni. He website-ah hian Artificial Intelligence (A.I.) dah nghal niin, mizo ṭawng ngeiin HIV/AIDS chungchanga zawhna neih zawng zawngte a zawh theih nghal vek bawk a ni. He website hi mipui zawng zawngin an hman tangkai theih nan a tam thei ang ber theh darh (publicise) nise tiin committee chuan a rel a ni.

Vawiin meeting-ah hian Serchhip District-a kum tina kalpui thin ‘Red Ribbon Quiz Competition’ chu kumin hian hlawhtling taka neih leh tura rel a ni bawk a. District Level Quiz Competition hi ni 30 July, 2026 hmaa neih fel tura tih a ni a. District Education Officer (DEO) rawtna angin, School Level Quiz chu ni 18 June, 2026 hian Serchhip District chhunga Class 8, 9 leh 11 zirlai zawng zawng tan neih turin an rel a. School hrang hrang zinga ti tha ‘Top 10’ te thlang chhuakin, District Level Competition chu ni 28 July, 2026 hian DC Pisapui Hall-ah neih zui tura rel a ni bawk.

Pr. No. 145/2026 (SCP) Dated Serchhip 2nd June, 2026
Issued by District Information and Public Relations Officer; Serchhip District, Serchhip.