Press Release Dated Serchhip, the 3rd September 2026

Serchhip District bawrhsap-in NH 02 kawng siam hna thawktute kokhawm

Dated Serchhip, the 3rd September 2026: Vawiin khan NH02 kawng chungchangah Serchhip District Deputy Commissioner Pu Paul L. Khuma hovin MJA, khawtlang hruaitu Sub-Headquarters YMA leh Jt. VC hotute an thukhawm a, Serchhip District chhunga NH 02 kawng, Khumtung – Keitum inkar siam hna thawktu NHIDCL hotute leh Contractor hrang hrangte an tel bawk.

Vawiin thutkhawmah hian kawng siam that lailawk hna ‘temporary repairment’ thawh zawh takte thlirletna neih niin, Additional Deputy Commissioner Pi Dorothy Muansangi hnen atangin nimin leh thla liamtaa endikna lo neih tawh dan hrang hrangte report ngaihthlak a ni a; tun dinhmunah temporary-in kawng khuar zualpuite chu hnawh zawh tawh niin, lirthei tlan theiha siam that a nih tawh thu a sawi. Package hrang hrang changtu Contractor theuhte’n fur ruahtui tam zual a reh veleha ‘Parmanent Repairment’ an kalpui dan tur theuhte an sawi bawk.

Vawiina DC hova Serchhip khawtlang hruaitu leh MJA te thukhawm chuan, Contractor-te chu Permanent repairment hi October ni 1 atanga kalpui tan tura hriattirin, uluk taka vilzui reng an nih tur thu an hrilh a; kawng siam that hna thawk tur hian khaw tinah hnathawh viltu tur ‘Monitoring Team’ din tura rel niin, kawng khuar siam that dan turah pawh, kawng chhe lai hai zauh, laih khuar belh leh thawm that dan tur technical specification/guidelines ang thlapa tih tura ruahman niin, an ti ngei em tihte vilzui an ni dawn a, hemi atan hian Monitoring Team te chu Serchhip PWD ten technical support an pe dawn bawk a ni.

Vawiin vek khan Bawrhsap chuan kawng siamtu NHIDCL leh Contractorte chu, kawngpui siam hna ngaihthah leh hnathawh that loh hi mipui pawisawina ‘public nuissance’, mipui nunna derthawnawma dahna a nih thu hrilh nawn lehin, hna an thawk tha lo a nih chuan BNSS leh DM Act te hmanga danin thuneihna a pek angin khawng taka hmalak a nih tur thu a hriat nawn tir leh bawk a ni.

Pr. No. 249/2026 (SCP) Dated Serchhip 3rd September, 2026
Issued by District Information and Public Relations Officer; Serchhip District, Serchhip.