Press Release Dated Serchhip, the 29th September

Serchhip District Skill Committee thukhawm

Dated Serchhip, the 29th September: Nimin khan Serchhip District Skill Committee chu an Chairman, Deputy Commissioner Pu Paul L. Khuma hovin DC Meeting Hall-ah an thukhawm a, October ni 12, 2026 a Pradhan Mantri National Apprenticeship Mela (PM-NAM), Serchhip District-a neih dan tur leh ruahmannate thlir ho a ni.

PM-NAM hi Skill India Mission hnuaia Ministry of Skill Development & Entrepreneurship bultuma buatsaih thin niin, National Apprenticeship Promotion Scheme (NAPS) hnuaia mi a ni a. A tum ber chu thalai lehkha thiamte chu dawr lian, sumdawnna hmun leh company hrang hrangte nen thlunzawm a, training pek a, hnathawk thei leh mi hmantlak ni tura chherchhuah a ni.

He Scheme hnuaiah hian dawr/sumdawnna hmun neituten thalai hnathawh tur mamawhte chu an hnuaiah an la a, an training senso leh sum mamawh (stipend) te erawh sawrkarin a tum sak thin a ni.

Thalai hna zawng duh tan NAPS portal (apprenticeshipindia.gov.in) ah in-register theih a ni a, training zo tawhte chu sawrkar pawmpui (NCVET approved) certificate pek thin an ni.

Pr. No. 274/2026 (SCP) Dated Serchhip 29th September, 2026
Issued by District Information and Public Relations Officer; Serchhip District, Serchhip.