Press Release Dated Serchhip, the 25th May 2026
SERCHHIP-AH DISTRICT LEVEL NARCO COORDINATION CENTRE (NCORD) COMMITTEE THUKHAWM
Dated Serchhip, the 25th May 2026: Serchhip District Level Narco Coordination Centre (NCORD) Committee chu vawiin khan Serchhip DC Meeting Hall-ah an Chairman leh Deputy Commissioner ni bawk Pu Paul L. Khuma kaihhruaiin an ṭhukhawm. Meeting-ah hian NCORD Member Secretary, Serchhip S Pu Gavit Gogna bakah Department hrang hrang aiawhte, Village Council leh tlawmngai pawl hruaitute an tel a ni.
Ṭhutkhawm kaihruaitu Pu Paul L. Khuma chuan ruihhlo dona kawngah sawrkar leh khawtlang hruaitute inkarah thawh hona ṭha tak awm ṭhin chu lawmawm a tih thu a sawi a. Department tinte chu theihtawp chhuah zel tura chahin, ‘hmalakna report felfai taka siam zel ni se’ a ti a. Dan bawhchhetute chungah hremna lekkawh a nih theih nan, thawh hona ṭha tak neih zel a pawimawh thu sawiin, dan ang loa chetna lakah fimkhur tlang tur leh dan ang taka chak taka hma la turin kalkhawmte chu a fuih a ni.
NCORD Member Secretary Pu Gavit Gogna pawhin Police Department-te chuan ruihhlo do nan theihtawp an chhuah zel tur thu sawiin, ruihhlo kaihhnawihah mi man leh rinhlelhte chhuizui zel a pawimawh thu a sawi a, Department dangte nena thawh hona ṭha tak nei tura an inhawn reng thu a sawi bawk.
Vawiin meeting-ah hian April 1, 2026 aṭanga Serchhip District chhunga hmalakna hrang hrangte thlir ho a ni a. Report-a tarlan a nih danin, Police department chuan hemi hun chhung hian drugs kaihhnawihah mi 4 manin, heroin gram 46.95, cheng 9,39,000 man hu leh zu chi hrang hrang cheng 1,66,800 man hu an man a. NGO-te nen ṭangrualin Serchhip, Thenzawl leh N. Vanlaiphai-ah te ruihhlo vaih hna (joint patrolling) nei bawkin, ruihhlo kaihhnawih thubuaiah mi 6 Court-ah an thawn bawk a, Anti-Drug Awareness vawi 4 an huaihawt bawk.
Excise & Narcotics Department lam pawhin mi 3 man bawkin, heroin gram 32.4 an man a, an mi man zinga pakhat chu hmeichhia niin, pakhat chu kum tling lo a ni a, Juvenile Justice Board-ah thlen a ni.
Vawiin meeting-ah hian department hrang hrangte hnen aṭangin ruihhlo dona kawnga an hmalakna leh hma chhawp hrang hrangte ngaihthlak a ni a; ruihhlo do inzirtirna (awareness) chak zawka kalpui dan tur te, ruihhlo ngaite chhanchhuah leh enkawl zui dan (rehabilitation) chungchang te, leh dan kenkawhna (enforcement) lam tihchak lehzual a nih theih dan turte sawiho a ni bawk.
Pr. No. 134/2026 (SCP) Dated Serchhip 25th May, 2026
Issued by District Information and Public Relations Officer; Serchhip District, Serchhip.
