Press Release Dated Serchhip, the 25th August 2026
BAWLHHLAWH SAWNGBAWL DAN SWM RULES 2026 & PWM RULES 2016 CHUNGCHANGAH THUKHAWM
Dated Serchhip, the 25th August 2026: Vawiin khan Serchhip District Deputy Commissioner hovin Serchhip District-a bawlhhlawh sawngbawlna kawnga hmalaknate thlirletna leh hmachhawpte sawihona DC Meeting Hall-ah neih a ni.
Bawlhhlawh hman khat daih (Single Use Plastic) tihrem a nih theihna turin Inspection Team hrang hrangten endikna August thla chhunga an neih dan report ngaihthlak a ni a. Single Use Plastic (Polythene etc.) man khawl sate tihral dan turte, dan bawhchhetute hremna chungchangte, thingtlang lama Village Council leh NGO te nen tang tlanga hmalak zel dan turte sawiho a ni.
India ramah Supreme Court thupek bawhzuiin SWM & PWM Rules te khauh taka kenkawh a nih theih nan chak taka hmalak mek zel a ni a; Inspection Team te thla khatah vawi li tal endikna neia fehchhuah thin a ni dawn a. Dan bawhchhetute chungah hremna lekkawh a nih dawn avangin dawra thil lei tur (Consumer) te chu mahni bazar bag intodelh theuh tura ngen leh hriattir bakah mahni puala tui bottle neih theuh nise tia inzirtirna uar nise tiin committee chuan a rel a, faina kawnga hma kan sawn theih nan sawrkar leh mipuite kan tantlan a tulzia inhriattir fo nise tihte rel a ni.
Tun dinhmunah Solid Waste Management Rules angin bawlhhlawh chi li-a thliar hranna New Serchhip North leh South Area-ah kalpui tan a ni tawh a, Village Area-ah khaw pali-Sialsir, Sailulak, Leng leh Baktawng Chhuantharah te August thla atangin kalpui tan a ni tawh bawk. Serchhip, Thenzawl leh N. Vanlaiphaiah te Solid Waste Management Centre sak mek a ni a; Sialsir, Baktawng leh Keitumah Community Compost Yard, vantlang bawlhhlawh (tawih thei) paihna tur hmun siam a ni dawn bawk. A tul dan azirin hmun dangah pawh sak chhoh zel tura ruahman a ni.
Serchhip District chhunga Tourist Destination pali-Dilpui Area, Golf Course, Tuirihiau leh Vantawng khawhthla hmunahte Single Use Plastic hman khapna thupek chhuah a ni tawh bawk a ni.
India ram pumah chak taka hmalak mek a ni a, State tinah Chief Secretary kaihhruaina hnuaiah chak taka bawhzui niin District tina Deputy Commissioner te nen regular takin Meeting neih thin a ni.
Serchhip District Deputy Commissioner Pu Paul L Khuma chuan Serchhip District mipuite chu thahnemngaia district dangte tan pawha entawntlak nih tum theuh turin thawhpuiah a sawm a ni.
Vawiin meeting-ah hian concern department hotute bakah bawlhhlawh sawngbawltu Green Herd SP te an tel a ni.
Pr. No. 233/2026 (SCP) Dated Serchhip 25th August, 2026
Issued by District Information and Public Relations Officer; Serchhip District, Serchhip.
