Press Release Dated Serchhip, the 18th May 2026
SERCHHIP DISTRICT SPECIAL CELL FOR SOLID WASTE MANAGEMENT THUKHAWM | VILLAGE ACTION PLAN SAWI HO A NI
Dated Serchhip, the 18th May 2026: Vawiin khan Serchhip Deputy Commissioner kaihhruianain Serchhip District-a ‘Special Cell for Solid Waste Management’ chuan felfai leh mumal zawka bawlhhlawh chi hrang hrangte sawngbawl dan tur ‘Village Action Plan’ sawi hona, DC Meeting Hall, Serchhip-ah an nei.
He thutkhawm kaihruaitu Deputy Commissioner, Pu Paul L. Khuma chuan India ram pumah bawlhhlawh sawngbawl dan kawngah dan zawm tha lo an tam avangin Supreme Court chuan May ni 5, 2026 khan dan zawm tha tura thu chhuah a siam tih a sawi a. He thuchhuah leh Solid Waste Management Rules, 2026 tlawhchhanin Serchhip District chhunga khawpui (town) leh thingtlang (village) khaw tinahte chak taka hmalak dan tur ruahmanna hrang hrang siam a nih thu a sawi a; Khawtlang hruaitute leh mipuite tawiawmnate, khawtlang tanrualnate a pawimawh thu sawiin, faina leh hriselna kawngah mi dangte tana entawntlak nih tum theuh turin mi tinte a sawm a ni.
Vawiin thutkhawmah hian Deputy Commissioner Office-a Superintendent, Pu F. Lallawmkima’n bawlhhlawh sawngbawl dan tur chungchanga ruahmanna ‘Village Action Plan’ tlangpui sawi zauna a neih hnuin sawi hona neih zui a ni a. Hetah hian chhungkaw tinte mawhphurhna tur te, Village Level Solid Waste Management Committee (VSWMC) mawhphurhna tur te, Village Council leh Block Development Officer-te leh department hrang hrang mawhphurhnate sawi ho a ni.
He ruahmanna hnuaiah hian bawlhhlawhte chu chi li (4) – Wet Waste (tawih thei); Dry Waste (tawih thei lo); Sanitary Waste (zun leh ek thiarna thil hrang hrang etc.) Special Care Waste (rawng bur, damdawi chhia, e-waste etc.)-ahte thliar hran vek tur niin, a paihna tura siamahte chauh paih tur a ni dawn a. Hei bakah hian khaw chhunga bawlhhlawh hal khap tlat a ni dawn a, dan zawm lo leh bawhchhetute chu Solid Waste Management Rules Section 21 hmangin hremna khauh tak pek theih an ni dawn a ni.
Vawiin thutkhawmah hian sawrkar department hrang hrang aiawhte — Police, DRDO, DUDO, PHED, Health, EF&CC, RD&AD, MPCB, I&PR te bakah khawtlang hruaitu Village Council aiawhte an tel a ni.
Pr. No. 124/2026 (SCP) Dated Serchhip 18th May, 2026
Issued by District Information and Public Relations Officer; Serchhip District, Serchhip.
