Press Release Dated Serchhip, the 15th September 2026
Serchhip-ah CM Special Package Grant Phase-II sem a ni. Kalphung inhrilhhriatna hun hman nghal a ni
Dated Serchhip, the 15th September 2026: Vawiin khan Serchhip DC Pisapui Hall-ah Bana Kaih Scheme hnuaia CM Special Package Grant Phase – II semna hun hman a ni a; District Level Monitoring Committee Chairman, District Bawrhsap Pu Paul L. Khuma’n hun hmanpuiin, Serchhip District chhunga Department hrang hrang hnuaia Progress Partner (PP) thlan chhuah mi 176 te hnenah sem a ni.
He hunah hian Bawrhsap chuan fuihna thu sawiin Progress Partners te chu sawrkarin duhsak taka a thlante niin, ram economy innghahna la ni thei tura, beiseina leh rinna nena thlir an nih thu sawiin, rinawm taka an tih tur theuhte ti turin a fuih a, concerned department tinte pawh an hnuaia Progress Partner-te taima taka thawhpui a, tha taka en zui reng turin a chah bawk.
District Level Monitoring Committee Member Secretary Pi Rebecca Laldinmawii Hrahsel hnen atangin Serchhip District-a hmalak dan ngaihthlak a ni a; tarlan danin Phase-II hnuaiah CM Special Package grant hi March 24, 2026 khan Progress Partner mi 30 te hnenah Rs. 15,00,000 sem lo ni tawhin, May 20, 2026 khan mi 47 te hnenah Rs. 23,50,000 sem a lo ni tawh bawk a; vawiin September 15, 2026 hian mi 176 te hnenah Rs. 88,00,000 sem leh a ni a, DBT system hmanga sem niin direct-in Progress Partners te Bank Account-ah pawisate hi thun thin a ni a. Pawisate hi a ni lo zawnga an hmang a nih chuan lak letsak emaw bungraw laksak emawtea hrem theih an ni.
Vawiin hun hmannaah hian concerned department hotu theuhte hnen atangin kalphung inhriattirna leh infuihna thu ngaihthlak a ni a; DIPR Serchhip ten CM Special Package kaltlanga hlawhtlinna lo chang tawhte Success Story an ti chhuak bawk a; SDC Pu Vanthangpuia’n lawmthu sawiin hun hi a khar a ni.
Vawiinah hian AH&Vety hnuaia Progress Partner mi 63, C&I hnuaia mi 47, Horticulture hnuaia mi 44, Agriculture hnuaia mi 7, Fisheries hnuaia mi 4, Sericulture hnuaia mi 3 leh Tourism hnuaia mi 1 te hnenah CM Special Package Grant hi sem a ni.
Pr. No. 259/2026 (SCP) Dated Serchhip 15th September, 2026
Issued by District Information and Public Relations Officer; Serchhip District, Serchhip.
