Press Release Dated Serchhip, the 15th June 2026

SERCHHIP DISTRICT HOSPITAL-AH KHUM 15 AWM THEIHNA TUR MAKESHIFT BUILDING THAR HAWN A NI

Dated Serchhip, the 15th June 2026: Vawiin khan Serchhip District Hospital-a khum 15 awm theihna tur Makeshift Building thar chu hawn a ni. A hawnna inkhawm hi Chief Medical Officer Conference Hall, Serchhip-ah buatsaih niin, Lok Sabaha MP Pu Richard Vanlalhmangaiha’n khuallian niin a hmanpui a, Serchhip District Deputy Commissioner Pu Paul L. Khuma chu khualzahawm niin, Joint VC Chairman Pu R. Sanghmingthanga’n hun a kaihruai a ni.

Khuallian Pu Richard Vanlalhmangaiha chuan fund pek chhuah kawngah, ram tana ro tling thilte a ngaih pawimawh thu sawiin, Makeshift Bulding sak nana hmalakna chu thil ngaihhlutawm tak a nih thu a sawi a. Kalphung thar Sawrkarin Department hrang hrangah theihtawp chhuahin tan an lak thu sawiin, ‘Health Deparment chu Deparment thang nasa pawl tak an ni’ a ti a. Mizoramin Health Minister tha tak kan nei chu lawmawm a tih thu sawiin, MUHCS pawhin ram pawn thlenga ngaihhlut a hlawh thu leh Serchhip District-ah pawh beneficiary 715 vel an awm tawh thu a sawi bawk. Serchhip District chu district hmasawn leh danglam bik nia a hriat thu sawiin DISHA Meeting-a District hrang hrang a tlawh kualnaah pawh ‘Serchhip District chu District tam takin Central Scheme implement kawngah pawh an pha lo che u a ni,’ a ti a. Kum 1978-a MLA hmeichhia thlang tling thei District, hmeichhe dinhmun chawi sanna kawnga hmahruaitu an nih thu pawh sawiin hma sawn zel turin duhsakna a hlan bawk a ni.

Khualzahawm Serchhip DC Pu Paul L. Khuma chuan Damdawi In khum indaih lohna hian mipuite nunah leh ni tin khawsakna kawngah nasa takin nghawng a neih thu a sawi a. Sawrkar hruaitu Chief Minister leh Lok Sabha MP ten Serchhip mipuite harsatna hrethiama, Makeshift Bulding sak hlawhtlin a nih theih nana an hmalaknaah lawmthu sawiin, Serchhip Joint VC-ten fund awm sa ni miah lo ata, awma siama mipui tana an pen chhuahna chu fakawm a tih thu a sawi bawk a. Health Department-a thawkte hnenah pawh lawmthu sawiin, mipuite’n an chhawr nghal theih tura hma la zui (activate) nghal turin a ngen nghal bawk a. Kalkhawmte chu mi dangte tana malsawmna ni tura fuihin, peih chin baka ke pen luih hram hramna hian hmasawnna nasa zawk a thlen thin tih hre renga, theihtawp chhuah zel turin a chah bawk.

District Medical Superintendent Dr. ZD Lalmuanawma pawhin thu sawiin Joint VC Secretary Lalrinmawia Khiangte hnen atangin ngaihthlak a ni a. Tarlan a nih danin building zau zawng (area) hi 28ft x 33ft a ni a, floor tile phah niin 1st floor-ah toilet European 2 leh Indian 3 dah niin 2nd floor-ah European 1 leh Indian 3 dah a ni bawk.

Chief Minister hmalakna kaltlangin NEDFi CSR atangin cheng nuai 17.3 leh MP Fund atangin cheng nuai 20 hmuh a ni a; he building sak hna thawktu Joint VC te hian sum hman bang awm ang angte chu CM Relief Fund-ah an chhunluh leh vek tur thu an sawi bawk a ni.

Pr. No. 161/2026 (SCP) Dated Serchhip 15th June, 2026
Issued by District Information and Public Relations Officer; Serchhip District, Serchhip.