Press Release Dated Serchhip, the 14th October, 2026

Serchhip District DC Office leh SELCO tangkawp ten SHG hnenah Aieng sawngbawlna khawl an hlan

Dated Serchhip, the 14th October, 2026: Vawiin khan DC Meeting Hall-ah Serchhip District DC Office leh SELCO tangkawp ten, ‘Project Thlai & Thei’ hnuaia hmalakna peng pakhat atan, Chhingchhip-a SHG ‘Hmasawnna Duhtu’ te hnenah, ni zung chakna hmang, Aieng sawngbawlna khawl an hlan.

Additional Deputy Commissioner Pi Dorothy Muansang-in khawl inhlanna hun hi kaihruaiin, District Administration hmalakna te leh SELCO te nena thawh hona tur leh hmachhawp hrang hrangte a sawi a; SELCO State Lead Pu Lalnuntluanga Colney hnen atangin SELCO hnathawh leh hmalaknate ngaihthlak a ni bawk a. Vawiina khawl hlan tak hi Aieng zai lepna (slicer), tih rona (solar dryer), leh her dipna (pulverizer) khawlte niin a capacity hi 100kg a ni.

Bawrhsap Pu Paul L Khuma chuan heng khawlte hian Aieng chingtute chu an thlai tharte man man zawka an sawngbawl theih nan leh an hralh theih nan te, eizawnna tha zawk siamna kawngahte a puih ngei a beisei thu sawiin, enzui zel an nih tur thu a sawi a. A hman dan leh enkawl zui dan turte uluk taka zira, hlawhtlinpui ngei turin duhsakna a hlan bawk.

Vawiin hun hmannaah hian SHG Hmasawnna Duhtu member te, BDO, MzSRLM-a thawkte leh official dangte an tel a, SDO (Sadar) Pi Rebecca Laldinmawii Hrahsel-in lawmthu sawiin hun hi a khar a ni.

Pr. No. 290/2026 (SCP) Dated Serchhip 14th October, 2026
Issued by District Information and Public Relations Officer; Serchhip District, Serchhip.