Press Release Dated Serchhip, the 10th June 2026
SERCHHIP DISTRICT-A BANK HRANG HRANGTE DINHMUN THLIRLETNA LEH HMA LAK ZEL DAN TURTE SAWI HONA DCC/DLRC/DLSC MEETING NEIH A NI
Dated Serchhip, the 10th June 2026: Vawiin khan Serchhip-ah District Bawrhsap Pu Paul L. Khuma kaihhruaiin December 2025 & March 2026 Quarter tawpa Serchhip District chhunga Bank hrang hrangte dinhmun thlirletna leh sawi hona DC Meeting Hall-ah neih a ni. Lead District Manager Pu Lalnghawrliana leh Serchhipa Bank hrang hranga Branch Manager-te bakah sawrkar department hotute an tel a ni.
Vawiin thutkhawmah hian Govt. Sponsored Scheme hrang hrang NRLM, NULM, PMEGP, SUI, PMMY, KCC leh Social Welfare Scheme – PMJJBY, PMSBY leh APY etc. hnuaia hmalaknate leh Bank hrang hrangte thawh that dan (performance) report- te en ho niin, tan lak ngaihna laite sawi ho a ni a. Govt. Schemes kalpui thin sawrkar department hrang hrangte leh bank te inkara thawh hona tha zawk a awm theih dan turte leh Financial Literacy Camp – sum leh pai enkawl dan leh bank kaltlanga sum khawl leh peipun dan inzirtirna buatsaih chungchangte sawi ho a ni bawk a. Bank branch hrang hrangte him lehzualna atana Police ten an tlawh/vil dan tur te, loan rulh that loh awm thin (NPA) tih tlem dan tur te, Community Based Recovery Mechanism (CBRM) mumal zawka kalpui dan tur te, mobile/computer kaltlanga dan bawhchhiatna (Cyber Crime/Fraud) awm thei laka inven dan leh thil tisualtute hrem dan tur chungchangte sawi ho a ni bawk.
March 2026 quarter tawp, ni 31.03.2026 thlenga Serchhip District-a Bank-a pawisa dahluh tawh zawng zawng tlingkhawm chu cheng nuai 63250.18 a ni a, Bank-in loan a pekchhuah tawh chu cheng nuai 44544.22 niin, Credit Deposit Ratio (CD Ratio) chu 70.43% a ni a (CD Ratio hi Bank-in mipui pawisa a khawl atanga loan a pekchhuah zat tehna a ni), hei hian District chhungah sum che vel a ṭha tih entir a ni. Pradhan Mantri MUDRA Yojana (PMMY) hnuaiah March 2026 quarter tawp chhungin mi 326 hnenah Rs. 1163.41 lakh semchhuah a ni. National Rural Livelihood Mission (NRLM) hnuaiah Self Help Group (SHG) 128 hnenah Rs. 612.95 lakh pek a ni a, Pradhan Mantri Jan Dhan Yojana (PMJDY) hnuaiah District chhungah bank account 22,813 hawn tawh a ni bawk.
Pr. No. 152/2026 (SCP) Dated Serchhip 10th June, 2026
Issued by District Information and Public Relations Officer; Serchhip District, Serchhip.
