Press Release Dated Serchhip, the 10th July 2026

SERCHHIP DC IN RALTLANTE HNENA SEM TUR BUHFAI A VAILIAM

Dated Serchhip, the 10th July 2026: Vawiin khan Serchhip Bawrhsap Pu Paul L. Khuma chuan Serchhip District chhunga raltlan awm mekte hnena sem tur Buhfai Kg 31789 chu Serchhip DC Office tual atangin a vailiam.

Serchhip District Bawrhsap chuan Serchhip District chhunga raltlante hnena buhfai sem tur chungchangah hian tun thla ni 3 khan lehkha tichhuakin, YMA ten raltlan list-an lakkhawmte hnenah mi pakhat tan kg 35 zela semchhuah a ni dawn a ni. Sub Headquarters YMA Serchhip-in a huam loh Baktawng leh Chhuanthar Tlangnuam huam chhunga mite tan pawh July 24, 2026-ah chuan sem fel vek tura ruahman a ni.

Sawrkar laipui ruahman anga raltlante hnena buhfai semchhuah tur atan hian Serchhip DC Office-a raltlan list awm sa chu tunhnai khan Serchhip Sub Headquarters YMA huam chhunga Branch hrang hrangte hnenah pekchhuah niin enfiahna neih a nih hnuah Serchhip DC Office-a report an thehlut a, Report atanga a lan danin tun dinhmunah Serchhip District-ah raltlan mi 908 an awm mek a, heng zinga mi 648 te chu Myanmar atanga raltlan niin Bangladesh atanga raltlan mi 239 leh Manipur atanga raltlan mi 21 an awm bawk a ni.

Raltlan List-a a lan danin Thenzawl Farm Vengah raltlan tam berin mi 172 an awm a, raltlan awm tlemna ber chu Khawbel niin mi 2 an awm thung. Heng bakah hian Bangladesh atanga raltlan mi 239 te hi Thenzawl-a awm te vek an ni thung a ni.

Serchhip District-ah Myanmar atanga raltlan Sailulak-ah 4, Lungkawlh-ah 18, Leng-ah 22, N. Vanlaiphai-ah 39, Khawlailung-ah 7, Keitum-ah 11, Thenzawl-ah 107, Zote South-ah 4, Chhiahtlang-ah 8, Vanchengte-ah 5, Khawbel-ah 2, Mualpui Chhingchhip-ah 19, Baktawng-ah 62 leh Chhuanthar Tlangnuam-ah 58 bakah Serchhip khaw chhunga Branch hrang hrang 11-ah mi 282 an awm a, Kawnpui South-ah tam berin 67 an awm a, Chhim Veng-ah 46, Darnam Veng-ah 41, Chanmari Veng-ah 26, Hmar Veng-ah 24, Dinthar Veng-ah 19, Field Vengah 18, P&E Veng-ah 16, Serchhip Kawnpui North-ah 15, New Serchhip Bazar-ah 7 leh IOC Veng-ah 3 te an awm a ni.

Pr. No. 181/2026 (SCP) Dated Serchhip 10th July, 2026
Issued by District Information and Public Relations Officer; Serchhip District, Serchhip.