Press Release (Dated 9th Aug 2024)

Serchhip District Hospital building thar sak chungchang ngaihtuah

Dated Serchhip, the 9th August, 2024: Vawiin khan Serchhip DC Pu Paul L.Khuma hoin Serchhip DC Meeting Hall ah Serchhip District Hospital building thar sak bul tan dan tur ngaihtuahin mi pawimawh te an thukhawm.

DC Pu Paul L.Khuma chuan hmasawnna ruhrel lian tham leh mipui vantlang tana tangkai tur project te chu a rang thei ang bera bul tan leh thawh zawh zung zung a tulzia meeting ah hian a sawi a. Project bul tan tak tak hmaa a inmun chhung a rei thin avangin a tira sum ruahman zat aiin senso a sang chho thin a, hei hian project tihpuitlinna kawngah harsatna a thlen fo thin, a ti. Hospital sak hi rang taka bultan nghal a nih theihna turin meeting a tel te chu uluk taka an ngaihtuahna seng a, hmasawn zawnga ro an rel theih nan tan la turin a chah a. Project tha taka a puitlin theih nan vil leh endik kawngah pawh taimak a tul thu DC chuan a sawi a ni.

Vawiin meeting-ah hian District Administration aiawh te, Health & Medical Education Addl Director te, Serchhip District Hospital leh CMO hotute, P&E leh PHE te, Serchhip Town Development Committee, Serchhip NGO Coordination Committee, Serchhip Joint Action Committee aiawh te leh a sa tu tur contractor te an tel a. Building sak dan tur ruangam chipchiar taka thlirho a ni.

Stakeholders te nen a huhoa inrawnkhawmna neih thin a ni dawn tih meeting ah hian sawi lan a ni a. Hospital design te uluk taka enhoin mipui tan leh hospital tana tha ber turin a tul anga her rem theih a nih dan te meeting ah hian sawi lan a ni bawk.Serchhip mipui, khawtlang hruaitute leh department pawhin he hospital sak bul tan thuai thuai an nghahhlelh thu meeting ah hian uar taka sawilan a ni a. Chief Minister Pu Lalduhoma, bialtu MLA ni bawk remtihnain a tira sak dan tur ruahmanna aia changtlung zawka Building design hi duan a ni a, a rang thei ang berin hospital sak tan dan zawn nghal ni se, tiin an rel a ni.

Serchhip District Hospital building thar sakna tur sum hi Power Grid Corporation of India Limited (PGCIL) Corporate Social Responsibility (CSR) fund atanga hmuh a ni a. He project hian a ruhrel dinna mai bakah hmanraw leina tur sum thahnem tak a keng tel a. Inremna thuthlung Memorandum of Understanding hi May 27, 2022 khan Mizoram Sawrkar leh PGCIL ten an ziak a ni. A satu tur atan hian Mizoram State Works Advisory Board chuan Zamzo Engineering Construction and Consultancy, Aizawl chu a thlang a. Hospital building hlui hi thiah zawh fel a ni tawh a ni.

Pr No. 154/2024 (SCP) Dated Serchhip 9th August, 2024
Issued by District Information and Public Relations Officer; Serchhip District, Serchhip.