Press Release (Dated 8th January, 2025)
Serchhip District Village Council Electoral Roll tlangzarh
Dated Serchhip, the 8th January, 2025: State Election Commission, Mizoram ruahman angin Village Council Inthlanpui neih tura Serchhip District chhunga Village Council hrang hranga Electoral Roll ennawn hna chu zawhfel niin vawiin khan Serchhip District Election Officer (DEO) leh District Bawrhsap Pu Paul L. Khuma’n a tlangzarh.
Serchhip DC Meeting Hall-a Village Council Electoral Roll tlangzarh takah hian Bawrhsap Pu Paul L. Khuma chuan Village Council Inthlanpui-a hman tur Electoral Roll ennawn hna tluang taka zawhfel a ni leh ta chu lawmawm a tih thu sawiin, sawrkar-a thawktute leh tlawmngai pawl hrang hrang, Village Level Officer (VLO) te leh Political Party bakah Village Level Standing Committee a thawktute inpekna chu lawmawm a tih thu a sawi a. Inthlanpui hmachhawn leh mai tur kan nih avangin inthlanna felfai leh thianghlim kan neih theihna tura tanrualpui-ah a sawm nghal bawk a. Hemi hnu hian Village Council 56 Inthlanpui a hman tur Electoral Roll chu a tlangzarh a. ERO, AERO leh Political Party hrang hrangte hnenah Electoral Roll hi semchhuah nghal a ni.
He hunah hian Serchhip Election Officer Pi F. Lalnisai chuan Electoral Roll dinhmun tlangpui tarlangin, Serchhip District-ah hian Village Council 54 a awm mek thu leh VC thar pahnih siam a nih dawn avangin tun tumah hian VC 56 te tan Electoral Roll hi tlangzarh a nih thu a sawi a; he Roll-ah hian mipa 24400 leh hmeichhia 26043 an vaiin 50443 an awm a ni. Tun tuma Electoral Roll ennawn ah hian kum 2022-a Electoral Roll chu Draft Roll-ah hman a nih avang leh VC ramri siamthat engemaw zat a awm avangin Draft Roll aia punna sang tak tak leh kiamna nasa tak tak a awm thu a sawi bawk a ni.
Vawiin a Electoral Roll thar tlangzarh a nih rual hian State Election Commission, Mizoram ruahman angin Electoral Roll siam laia data error awm thei te leh VC siam thar leh ramri rin that avanga dik lo te leh siamthat ngai tan January 13, 2025 thlengin VLO te kaltlangin dilna thehluh leh theih a ni dawn bawk a ni.
Electoral Roll tlangzarhna ah hian Serchhip ERO Pu K. Lalhlimpuia, Tuikum ERO Pi F. Lalnisai, Hrangturzo ERO Pu Peter Malsawmtluanga te bakah Political Party hrang hrang aiawhte leh MJA aiawhte an tel a ni.
Pr No. 5/2025 (SCP) Dated Serchhip 8th January, 2025
Issued by District Information and Public Relations Officer; Serchhip District, Serchhip.
