Press Release Dated 30th January, 2025

Serchhipah Road Safety Month hman dan tur rel

Dated Serchhip the 30th January, 2025: Road Safety Month hi Mizoram pumah February, 2025 chhung hian hman a ni dawn a. Vawiin khan Serchhip DC Pu Paul L Khuma hoin District Road Safety Committee chuan hun hman dan tur ruahmanna an siam.

Road Safety Month hawnna inkhawm hi February ni 4 (Thawhlehni) hian Serchhip DC Pisapui Hall-ah hman a ni dawn a. He hunah hian lirthei khalh fimkhur a tulzia te, sawrkar dan leh hremna awm thei te leh a kaihhnawih thil dangte inzirtirin hun hman a ni dawn a. Road Safety Month kharna hi February ni 28 ah neih a ni ang.

February thla chhung hian Transport Department te leh Police Department tangkawp chuan lirthei khalhtuten dan an zawm leh zawm loh an endik thin dawn a. Mipuite traffic chungchanga an fimkhur a, an him zawk theih nan Road Safety Month denchhen hian No Tolerance Month hman nghal a ni ang. Awareness zau zawka pek a nih theih nan Cable TV ah panel discussion neih ni se, tih vawiin meeting-ah hian an rel a. Traffic Police duty-naa tawiawm turin High School leh College atangin NCC te chu sawm an ni dawn bawk a ni.

Pr No. 37/2025 (SCP) Dated Serchhip 30th January, 2025
Issued by District Information and Public Relations Officer; Serchhip District, Serchhip.