Press Release (Dated 2nd Aug 2024)

Women & Child Development hmalaknain Thenzawlah thingphun hnatlang neih a ni

Dated Serchhip, the 2nd August, 2024: Vawiin khan Thenzawl Common Poshan Vatika-ah ‘Ek Ped Maa Ke Naam (A tree as tribute to my Mother) and Plant4Mother’ hun hman niin thingphun runpui neih a ni.

He hun hmanpuitu Women & Child Development Director Pi Zoramthangi Chhangte chuan ‘Ek Ped Maa Ke Naam (A tree as tribute to my Mother) and Plant4Mother’ hmalakna kal zelah Thenzawl ah hun an hmang thei chu lawmawm a tih thu a sawi a. “Kan ram leh khawvel pawhin a mamawh thing te hi boruak tha min petu an ni a, tunlai khawvela kan buaina lian ber boruak lum chho zel venna atana pawimawh ber a ni”, a ti. Thing leh mau te hian leilung luang ral tur a veng a, khuarel chhiatna thleng thei tam tak lakah vengtu tangkai a ni a, mihringte kan dam khawchhuah theihna tura thil pawimawh a nih avangin mipui thinlungah thingphun pawimawhna leh thingphun uar kan mamawh tawhzia tuhngheh a tul a ni, Director chuan a ti a. “Vawiina kan thing phunte hi kan tuchhuan lo la awm zel turte hnena kan thilpek theih hlu ber a ni tih hriain, tuna kan thing neih sa te humhalh chungin thingphun i uar sauh sauh ang u” tiin kalkhawm te a fuih a ni.

He programme hi Women & Child Development Director Pi Sailopari’n a kaihruai a. Ek Ped Maa Ke Naam an kalpui zelnaah Anganwadi Centre tinah thei tiak phun uar tura hmalak mek a nih thu sawiin, nasa zawka thing leh thei phun uar kawnga hma kan sawn theih nan vawiin programme hi hman a ni, a ti.

Thenzawl Forest Division DFO Pu Lalnungrenga pawhin thu sawiin thing leh thlai phun tam a tul thu leh kan ramin kan neih sa te ti chereu lova kan humhalh tlat a pawimawh thu a sawi a, tun atanga hma kan lak loh chuan nakin zelah kan tan a pawi dawn a ni, a ti.

Thingphun hnatlang ah hian Serchhip District Programme Office leh Serchhip ICDS Project, Thenzawl Forest Division Thenzawl hnuaia thawktute bakah Thenzawl khuaa Anganwadi Workers leh Anganwadi Helper te pawh an tel a, thing tiak 60 chuang an phun a ni.

‘Ek Ped Maa Ke Naam (A tree as tribute to my Mother) and Plant4Mother’ hnuaia thing phun runpui hi July ni 22, 2024 khan Women and Child Development Minister Pi Lalrinpuii’n Sakawrhmuituaitlang, Sihphirah a lo hawng tawh a. He hunah hian Environment Forest & Climate Change Department te nen thawk hoin thing tiak 50 chuang an phun a ni.

Pr No. 145/2024 (SCP) Dated Serchhip 2nd August, 2024
Issued by District Information and Public Relations Officer; Serchhip District, Serchhip.