Press Release (Dated 28th August, 2024)

Serchhip DC hoin NH-54 siam hna thawh mek chungchang sawiho

Dated Serchhip, the 28th August, 2024: Vawiin khan Serchhip Bawrhsap Pu Paul L.Khuma, Competent Authority for Land Acquisition (CALA) ni bawk hovin DC Meeting Room ah NHIDCL in Serchhip District chhunga NH-54 siam hna an thawh mek chungchang sawi ho a ni.

Meeting-ah hian kar kalta ni 24.8.2024 a Keitum leh Bungtlang khuaa kawng siam la zawhfel lohna hmun hrang hrang DC in a tlawhchhuah tawh te, siam zawhfel thuai a nih theih nan hmalak dan tur an lo sawi tawhte tarlan a ni a. An thawh tawh chin leh hmabak la awm te thlir ho a ni a.

Kawng laihna vungin Serchhip Zawlpui Mat phaia loneitute harsatna a thlen chungchang sawi niin leilet tih chhiat bakah an tui lak kawng a tihchhiat chungchang thu hi NHIDCL leh an hnuaia thawk contractor te hi sawipui an ni bawk a ni.

Geo reference co-ordinate chungchang sawi niin hemi atana sum mamawh tur chungchangte sawi lan a nih bakah kawngpui siamin ram a tihchhiat sakte zangnadawmna la pek lohte pawh pe thuai tura tih an ni bawk a ni.

He meetingah hian Addl. DC Pu Lalrinzuala, SDO (S) Pi Rebecca Laldinmawii Hrahsel, Pu Gaston Vanlalhriatpuia, Settlement Officer te NHIDCL hotute leh an hnuaia thawk contractor te an tel a ni.

Pr No. 172/2024 (SCP) Dated Serchhip 28th August, 2024
Issued by District Information and Public Relations Officer; Serchhip District, Serchhip.