Press Release (Dated 27th November 2024)

Serchhip Bawrhsap Pu Paul L Khuma’n Hualtu Branch YMA Kum 50 tlin lawmna a hmanpui

Dated Serchhip, the 27th November, 2024: Vawiin khan Hualtu Branch YMA te chuan an khaw khelmual a ‘Hualtungamtawna Run’ an sakah an Branch YMA Kum 50-na lawmna hun an hmang a. Serchhip DC Pu Paul L Khuma chuan khuallian niin he hun hi a hmanpui a ni.

Hualtu Branch YMA Golden Jubilee lawmnaah hian tukin zing Dar 9:45 khan khuallian – District Bawrhsap Pu Paul L Khuma chuan Branch YMA Jubilee lungphun chu hawngin, hemi hnu hian Hualtungamtawna Runah Hualtu Branch YMA President hmasa ber Pu J Thansiama’n Jubilee Mei a det bawk.

Khuallian Pu Paul L Khuma chuan Hualtu Branch YMA in kum 50 a tling ta chu a lawmpui thu sawiin lawmpuina chibai a buk a. An pi leh pute leh an YMA ten nundan tha an kawhhmuh thin avangin Hualtu khua chu khaw taima, kawng hrang hranga entawntlak an ni a; kum naupang zawk te ah pawh zirtir chhunzawm zel turin a chah a ni. YMA member te chu thiltum ‘motto’ a an neih angin, hun awl hmang tha tur te, kawng hrang hranga Zofate hmasawnna ngaihtuah tur leh Kristian nundan tha ngaisang turin a chah a. An motto a taka nun chhuahpui chu Model Village nih theihna kawng pawimawh tak a ni, Pu Paul L Khuma chuan a ti.

Bawrhsap chuan YMA in kawng hrang hranga hma a lakna chu Isua zirtirna nen thil inang leh kalkawp tlat nia a hriat thu sawiin, hei hi vawn nun zel pawh a pawimawh thu a sawi a. Mihring thatna ringawt chuan thui tak a daih thei lo a, chuvangin, tawngtaina nen khawtlang tana hna thawk turin a chah a. Mipuite tana rawng an bawlnaah pawh hmangaihna nena kal zel a tul thu a sawi bawk. District inenkawlna kawngah Serchhip DC chuan YMA te nen thawhhona tha tak an neih thu a sawi a, thawhhona tha an neih zel a beisei thu a sawi bawk a ni.

YMA Golden Jubilee lawmna programme hi Hualtu Branch YMA President Pu R Lalengkima chuan a kaihruai a. Central YMA Treasurer Pu Roneihthanga chuan Hualtu Branch YMA Souvenir a tlangzarh a. Central YMA, Serchhip Sub Hqrs YMA leh Tawi Tlang Group YMA aiawh te bakah Hualtu Village Council aiawh ten thu an sawi bawk a ni.

Golden Jubilee lawmna Programme ah hian Hualtu Branch YMA leh YMA chhang ten hnam lam mawi tak an entir bakah Programme kar lakah Hualtu Branch YMA Zaipawl te leh mimal zaithiam te an zai bawk.

Hualtu Branch YMA hi Kum 1943 khan lo ding tawh mahse, Mizoram buai avangin Baktawng khuaah sawikhawm an ni a. Hualtu khuaa an let leh hnu kum 1974 ah din thar lehin, kumin hi an kum 50-na a lo ni ta a ni.

Hualtu khuaah hian chhungkua 240 an awm a, mihring 1200 vel an khawsa mek a ni. Hualtu Branch YMA te hi Serchhip Sub Hqrs YMA hnuaia Tawi Tlang Group YMA huamchhung a awm an ni a, tun dinhmunah member 621 an awm a ni.

Vawiina Hualtu Branch YMA ten an Kum 50-na Golden Jubilee an lawmna hunah hian Branch YMA hruaitu lo ni tawh te chawimawina hun an hmang a. Hualtu Branch YMA Vice President Tv. R Lalawmpuia’n lawmthu sawiin hun a khar a. Tlai lamah khawtlang huapin Golden Jubilee lawmna ruai an kilho a ni.

Pr No. 271/2024 (SCP) Dated Serchhip 27th November, 2024
Issued by District Information and Public Relations Officer; Serchhip District, Serchhip.