Press Release (Dated 26th August, 2024)

Serchhipah Teachers’ Day 2024 lawm dan tur rel

Dated Serchhip, the 26th August, 2024: Vawiin khan Serchhip District Level Committee for Celebration of Teachers’ Day chu an Chairman Pu Paul L.Khuma, Serchhip DC ni bawk hovin DC Meeting Hall-ah an thukhawm a, Serchhip District a Teachers’ Day 2024 lawm dan tur an ngaihtuah a ni.

DC Pu Paul L.Khuma chuan zirtirtute pawimawhzia sawiin zirtirtu tha chuan zirlaibu inthiamtir ngawt piahlamah zirlai naupangte an lo putlin thlenga an rilru puthmang leh sukthlek danah, an hnathawhnaah te, mi dangte nena an inlaichinna kawngah te, nun kawng dik an zawh zel theihna atana kaihruaitu an ni, a ti a. Chuvangin, zirtirtu tha te hian chawimawi an phu a, theihtawp chhuaha kan chawimawi pawh a tul a ni, a ti.

Teachers’ Day 2024 denchhen hian Serchhip District chhungah zirtirtu tha chawimawi tlak thlang chhuakin, chawimawi ni se, tiin meeting chuan a rel a. A thlang tu tur atan Serchhip DEO kaihhruaina hnuaiah Working Committee din niin he Committee hian Award hming tur te, a thlan dan tur tehfung te leh a thlan awm mi te a ngaihtuah ang a, District Level Committee-in an enho leh dawn a ni.

Kumin Teachers’ Day 2024 hi mahni school theuhah mahni remhriat dan angin lawm ni se, tiin rel a ni a. School Education Minister thuchah chhiar chhuah a ni ang a, Serchhip DC chuan cable tv leh social media hmangin zirtirtute chibai bukna thu a sawi sawi bawk ang. Serchhip khawpui chhungah leh Sub Division ah te Teachers’ Day pualin banner tar ni se, an ti a. DEO leh SDEO te kutah a awm dawn a ni.

National Foundation for Teachers’ Welfare (NFTW) Fund atan Teacher ten Rs.200 theuh an thawh dawn a. He NFTW Fund atang hian zirtirtu natna khirh vei te leh harsatna tawk ten tanpuina an dil thei a, sawrkar leh private school zawng zawng a huam vek a ni.

Vawiin meeting-ah hian DEO Pu Lawmawma bakah Education Officer te, zirtirtu pawl hrang hrang aiawh te, tlawmngai pawl te leh official dang te an tel a ni.

Pr No. 167/2024 (SCP) Dated Serchhip 26th August, 2024
Issued by District Information and Public Relations Officer; Serchhip District, Serchhip.