Press Release (Dated 8th October, 2024)

Serchhip District chhunga bawlhhlawh sawngbawl dan tur leh faina beihpui neih dan tur rel

Dated Serchhip, the 8th October, 2024: Vawiin khan Serchhip DC Pu Paul L.Khuma hovin Serchhip District chhunga bawlhhlawh sawngbawl dan tur leh faina beihpui neih chhunzawm dan tur relin Serchhip DC Meeting Hall ah meeting neih a ni a. Additional DC Pu Lalrinzuala buatsaih Convergence Plan for Solid Waste Management in Serchhip District tih chu zirho niin pawm a ni a, Serchhip District chhunga Department kaihhnawih te, tlawmngai pawl leh khawtlang hruaitu aiawh ten hming an ziah hnan a ni.

DC Pu Paul L.Khuma chuan Serchhip District chu Mizoram chhunga District fai ber nih tuma tan lak a nih thu leh Department hrang hrang te, Village Council te, tlawmngai pawl – YMA, MHIP, MUP leh a dangte thawhhona tur Convergence Plan for Solid Waste Management chu Serchhip District-a a vawikhatna tura kalpui a ni dawn, tih a sawi a. He ruahmanna hi mumal leh chipchiar taka duan a ni tih sawiin, Mizorama District dangah pawh an la tih ngai loh, Serchhip District in hmahruaitu ni tura Convergence Plan khawr pum a ni ta chu lawmawm a tih thu a sawi a ni. Convergence Plan-in a tum ber, faina kawnga hmahruaitu ‘Clean Serchhip District’ a taka kan neih theih nan Serchhip District mipui zawng zawng te theihtawp chhuah turin Pu Paul L.Khuma chuan a sawm a ni.

Serchhip District huam chhung khaw hrang hranga bawlhhlawh sawngbawl dan tur leh faina chungchanga ruahmanna hi kum khat chhung ngawrh taka kalpui a ni dawn a. Faina chungchang inzirtirna te, bawlhhlawh thliar hran chungchang inzirtirna te, bawlhhlawh siam tam lo zawnga chhungtin te khawsak dan tur te leh a kaihhnawih inzirtirna te neih a ni dawn a. College ah leh school zirlaite zingah te; kohhran leh sunday school ah te, mipui kalkhawm gram sabha neihna hmunah te bawlhhlawh thliar hran leh faina chungchanga inzirtirna te kalpui thin a ni ang.

Serchhip District hman tur Solid Waste Management Centre hi sak thuai a nih dawn avangin hemi tinzawn hian hmalakna lian tham taka kalpui a ni dawn a. Chhungtin ten mahni inah theuh bawlhhlawh tawih thei leh thei lo thliar hran dan tur hi an lo zir lawk a, a tak taka an kalpui thuai theih nan hemi chungchanga inhrilhriatna leh inzirtirna hi uar taka kalpui a ni ang.

DC Pu Paul L.Khuma bakah Project Director, DRDO; Sr.EE, PHED; DEO; DUDO; DIPRO; DLAO; Joint VC Chairman, Serchhip Town; President, Serchhip District VC Association; President, MUP Serchhip District; President, MHIP Sub-Headquarters, Serchhip; President, YMA Sub-Headquarters, Serchhip te chuan he convergence plan hi tha taka kalpui a nih theih nan hming an ziah hnan a ni.

Pr No. 212/2024 (SCP) Dated Serchhip 8th October, 2024
Issued by District Information and Public Relations Officer; Serchhip District, Serchhip.