Press Release (Dated 17th September, 2024)

Pu Paul L.Khuma’n Swachhata hi Seva Campaign a hawng

Dated Serchhip, the 17th September, 2024: Vawiin khan Serchhip DC Pu Paul L.Khuma chuan Serchhip DC Conference Hall-a programme buatsaihah Serchhip District a faina beihpui Swachhata hi Seva Campaign a hawng.

DC Pu Paul L.Khuma chuan Swachhata hi Seva Campaign awmzia sawifiahin faina atana mipui te inpekna pawimawhzia a sawi a. Faina hi a taka kan nunpui a, kan nitin khawsak phungah a beh tlat a tul a ni, a ti. Ram bal leh tawp, rimchhia leh tenawm tih hi foreigner ten India ram an hmuh thin dan a ni a, chu chu thlak danglam tumin Prime Minister Narendra Modi chuan nasa takin a bei a, ram pumah faina beihpui kawng hrang hrangin kalpui reng a ni, DC chuan a ti a. India hnampa Mahatma Gandhi-an faina pawimawhzia a naupanlai atangin a nu in a zirtir thin a, chutiang bawkin Serchhip District a nu leh pa te pawhin an fate chu naupangte an nih lai atangin fai an zirtir a pawimawh em em a ni, a ti.

Khua, veng leh District fai nei tur chuan thawhhona a pawimawh thu Pu Paul L.Khuma chuan a sawi a. Sawrkar chuan faina beihpui thlakin nasa takin tan la mahse mipui mimirin nunphunga kan neih loh chuan awmzia a nei dawn lo, a ti a. Khawtlang hruaitute, tlawmngai pawl te leh kohhran hoten mipui te thinlungah faina kan tuh a ngai a; chutianga kan inzirtira, kan rilrua kan tuh ngheh loh chuan kan hmalakna te hi a hlawhchham dawn a ni, tih sawiin kalkhawm te chu mahni theuhah faina bul tan a, midangte zirtir chhawngtu ni turin a sawm a ni.

Swachhata hi Seva campaign in a tum ber chu mipui nawlpui faina hmalakna a tel tir a, faina chu mitin mawhphurhna a siam hi a ni a. He campaign hi India ram faina beihpui – Swachh Bharat Mission hmalakna peng pakhat leh India hnampa Mahatma Gandhi piancham 150-na lawmna ni pahfawma neih a ni.

Swachh Bharat Mission hi kum 10 chhung kalpui a ni tawh a, Swachhata Hi Seva erawh kum 7 kalpui a ni ta a. Khawpui chhunga a bultumtu atan UD&PA an ni a, thingtlang lamah PHED in hma an la thung. Kumin Swachhata Hi Seva ah hian Serchhip DC hovin programme hrang hrang neih tur duanchhuah a ni a. Vawiin khan a hawnna programme neih niin hemi zawh veleh faina kawngzawh Cleanliness Rally neih chhunzawm nghal a ni a. DC chuan he rally hi vailiamin DC tualzawl atangin IOC thleng kalkhawm ten kawng an zawh a, kawng dung tluanin bawlhhlawh te an chharfai a ni.

Hawnna programme ah hian Serchhip DC kaihhruaina hnuaiah kalkhawm ten Faina Thutiam an chhamrual bawk.

Swachhata Hi Seva hi October ni 2 thleng neih tur a ni a. Hemi hun chhung hian VC huap faina hnatlang, blackspot (hmunbal) tihfai, kan tui tlan hnar leh chhehvel tihfai, school leh office hmunhma tihfai, zirlai te tan inelna hrang hrang buatsaih, waste to art exhibition te neih tum a ni a. Lawmman hrang hrang VC area fai ber, hnatlanga thawkchhuak tam ber, thingtlang khaw fai ber inelna te buatsaih a ni a. Sanitation a thawktute tan a thlawna inentirna hawn a ni dawn bawk a ni.

Serchhip District hian nikum 2023 khan Mizorama District khawpui fai inelnaah pakhatna dinhmun a luah a. India rampum inelna Swachh Survekshan 2022 ah khan North East zone a mipui atanga feedback hmu tha ber lawmman Serchhip ULB ten an dawng a. SBM (G) ah kum 2017, July 26 khan Serchhip District hi Open Defecation Free (ODF) ah puan a ni a; July ni 20, 2022 khan ODF Plus District ah puan a ni leh a. East Lungdar RD Block chu Mizoram puma ODF Plus ni thei hmasa ber a ni. SBM (U) ah pawh Serchhip Town hian kum 2017, December ni 31 khan ODF nihna hi a lo dawng tawh bawk a ni.

Vawiin programme hi Sr.EE PHE Pu Isaac Lalchhuanmawia’n a kaihruai a. UD&PA leh PHED aiawhten presentation hmangin an hmalakna te leh hlawhtlinna te an sawifiah a ni.

Pr No. 193/2024 (SCP) Dated Serchhip 17th September, 2024
Issued by District Information and Public Relations Officer; Serchhip District, Serchhip.