District Chanchin

Serchhip District hi kum 1998 September ni 15 khan RD Block atangin District puitlingah hlan kai a ni a, Mizoram a district te ber a ni. Serchhip district hi Mizoram lai li a awm niin Tropic of Cancer in a tan tlang bawk a ni.

Serchhip District hi khaw chhak lamah Champhai District nen a in ri a, hmar lam leh hmar thlang lamah Aizawl District riin chhim lamah Lunglei District nen a in ri bawk.

Serchhip District hi Sub-Division pathum (3) ah then a ni a, chungte chu – Serchhip Sadar, North Vanlaiphai leh Thenzawl te an ni. Tin, Rural Development Block hnihah then a ni leh a chungte chu Serchhip RD block leh East Lungdar RD Block te an ni. Serchhip district ah hian khua 42 a awm a ni.

District Chanchin Tawi

  1. District Hming: Serchhip
  2. District Headquarter: Serchhip
  3. District Zau Zawng: 1421 sq.km
  4. Sub-Division Zat: 3
  5. RD Block Zat: 2
  6. Khaw Awm Zat (Chhiarpui 2011): 40
  7. Khawpui Awm Zat (Chhiarpui 2011): 3
  8. Tawng Hman: Mizo leh Saptawng

District Chanchin

District chanchin tlangpui: Serchhip District hi Mizoram Sawrkar Notification No. A.60011/2/95-GAD dt 29.7.1998 hmangin Aizawl District atangin sah thlak a ni a, Mizoram state hmun lai hawl luahtu hian District Headquarter atan Serchhip hmangin Mizorama District pariatna hi state chhunga district te ber niin 1421 sq.km chauh a zau a ni.

District zau zawng leh thuthmun: : Serchhip District hi 23∘35’N leh 23∘ N latitude leh 92∘41 ‘E leh 93∘10’ E longitude inkarah a awm a. Mizoram state laihawl a awm niin hmar lam leh hmar thlang thlengin Aizawl District nen a in ri a, khaw thlang lam leh chhim lamah Lunglei district, chhim chhak lamah Myanmar (Burma) riin khaw chhak lamah Champhai District a ri bawk. Serchhip District hi Tuipui zawl atanga tehin 1044 mtrs a sang a ni a. Serchhip khua, district headquarter ber hi tuipui zawl atangin 1281 mtrs a sang a ni bawk. Chhim leh hmar zawngin 41 kms a zau niin chhak leh thlang zawngin 40 km a zau a ni.

Soil: District chhunga lei tam berte chu red 7 laterite soil, alluvial soil leh hill/brown soil te an ni a, a hmun hma hi tlang ramah chuan awih chhe lutuk a ni lo.

Rivers: District chhunga Lui hming thang deuh deuh panga (5) te chu (i) Tuikum (ii) Mat (iii) Tuichang (iv) Tlawng (v) Lau. Heng lui te hi chhim lam atanga hmar lam hawia luang vek an ni. Serchhip district ah hian khuanu rel sa Dil hmuh tur a awm lo thung.

Forest: Serchhip district chhunga ram ngaw huam zau zawng chu 91,235 hectare niin, heng zinga 408 hectare chu ram ngaw chhah tak an ni a, 794 hectares te erawh chu ram ngaw thing leh mau bit lutuk lohna an ni. District pumpui atanga 64.17% chu ram ngaw a la ni.

September 15, 1998 atangin district rorelna chu hman tan a nia, Serchhip khua chu district headquarter ani. Serchhip district hi Mizoram a district zingah RD Block atanga District puitlinga hlan kai awm chhun a ni. Heng district thar dang – Mamit, Kolasib, Champhai leh Lawngtlai district te chu sub-division inrelbawl dan anga awmin Deputy Commissioner in district a officer rualte chu a ho khawm vek a ni.

Socio Economic Profile – Serchhip district-a chengte hi lo neih leh a kaihhnawih a eizawng an ni deuh ber a. District hedquarter Serchhip ah chuan kuthnathawktu zatve dawn chu lo nei mi an ni a. Thing tlang khaw te zawk ah te chuan sum chang thlai, bazaar a hralh chhuah nghal zung zung theih lamah hma an la nasa hle a, ranvulh lamah pawh nasa takin hma a sawn bawk.

Serchhip khaw chhungah hian sawrkar hnathawk leh sumdawngmi thenkhat ten dai hnaiah huan siam a ei chawp thlai chin te an uar viau bawk a. Hei hian chhungkaw nitin chawhmeh a lo tum ve bakah bazaar ah te khar chhawn tirin chhungkaw sek rek lei nan te a tangkai em em bawk a ni. Heng mite hian huan lo ram neiin ran vulh leh mahni eichawp thlai chin nan an hmang ber a, thingtlang zawkah te chuan vawkvulh leh ar vulh te chu an uar nain chhungkaw pakhatin vawk pahnih khat leh ar note 10-20 vel te an vulh ber a, thing mistiri leh ram vak mi – rawtuai, paa, aidu,tumbu etc khawrh a eizawng an awm fur bawk.

Khawpui lama ei leh bar chawk luh dan a zirin thingtlang lam eizawnna thui tak a in nghat tlat a, thingtlang hmun kil khawr tak tak atanga lo lut te chu khawpuiah chhun khawm niin, inkalpawhna that vak lohna ah pawh eizawnna atan theih ang angin hma an la thin a ni.