Press Release Dated Serchhip, the 9th November, 2026

Serchhip-ah ‘Eagle Eye Monitoring and Control System (EEMCS)’ kalpui dan tur sawi ho a ni

Dated Serchhip, the 9th November, 2026: Rukruk, dan bawhchhiatna leh chhiatrupna laka Serchhip khaw chhung leh a chhehvel venhimna tura Serchhip Deputy Commissioner Office hmalakna Project thar ‘Eagle Eye Monitoring and Control System (EEMCS)’ chu Ministry of Personnel (DARPG) chuan rem tiin, sanction a rawn pe a. Vawiin khan hemi chungchangah hian Deputy Commissioner Pu Paul L. Khuma hovin DC Meeting hall-ah thutkhawm pawimawh neih a ni.

Bawrhsap Pu Paul L. Khuma chuan he Project hi Serchhip mipuite himna tura hmalakna a nih thu sawiin, disaster thilah a ni emaw, rukruk leh dan bawhchhiatna hrang hrang thleng thinte beihletna leh invenna pawimawh tak tur a nih thu a sawi a. Dan kengkawhtu department-te leh khawtlang hruaitute nen tangrualin, khawtlang venhimna hmanraw pawimawh tak a nih ngei a beisei thu a sawi.

SDC Pu Vanthangpuia hnen atangin EEMCS chungchang leh he project kalpui dan tur report ngaihthlak a ni a. Chhiahtlang Kawn veng, Serchhip Kikawn veng leh Sailiam Kawn inkar hmun 20-ah CCTV (5MP) static leh unstatic te dah a ni dawn a, khawlai lun lai, ruihtheih thil tihna hmun leh rukruk leh lirthei dan bawhchhiatna hluarna hmunah te, mipui nunau tana hmun him lo laiah te dah tura ruahman a ni a. Command & Control Centre chu DC Office-ah dah a ni dawn a ni.

CCTV bakah hian hmun ualau tha laiah, LED Display Board pahnih (20×10 ft leh 16×9 ft), mipui ten Information leh thil pawimawh dang atana an hman tangkai theih tur dah a ni bawk dawn a. Additional Deputy Commissioner Pi Dorothy Muansangi kaihhruai Joint Inspection Team (Police leh khawtlang hruaitute telna) chuan CCTV dahna tura hmun pawimawh thlan chhuahte chu, a hmunhmate zir chiangin, an endik dawn a ni.

Vawiin meeting-ah hian Additional Deputy Commissioner Pi Dorothy Muansangi leh District Superintendent of Police Dhirendra Pratap Singh te bakah, Sub-Divisional Officer (Sadar) te, SDC te, SDPO te, DIPRO te, District Informatics Officer leh Excise & Narcotics Dept. aiawh te, Officer-in-Charge, Traffic te, MJA Serchhip leh khawtlang hruaitu VC leh YMA aiawhte an tel a ni.

Pr. No. 320/2026 (SCP) Dated Serchhip 9th November, 2026
Issued by District Information and Public Relations Officer; Serchhip District, Serchhip.