Press Release Dated Serchhip, the 9th September 2026

Serchhip-ah PM-RAHAT Scheme chungchang sawi ho

Dated Serchhip, the 9th September 2026: Serchhip District Bawrhsap Pu Paul L. Khuma hovin vawiin khan Road accident tawk ten cheng nuai 1.5 man hu thleng damdawi ina cashless-a inenkawlna an dawn theihna tur PM-RAHAT (Road Accident Victim Hospitalization and Assured Treatment) Scheme chungchang sawi hona DC Meeting Hall, Serchhip-ah neih a ni.

PM-RAHAT Scheme hi Ministry of Road Transport & Highways hnuai hmalakna niin, kawngpuia chetsualna avanga thihna thleng thin tih tlem nan leh Golden Hour chhunga enkawlna pek hman a nih theih nana duan a ni. (Chhiat tawh atanga darkar khat chhunga enkawlna dawn hman hian accident avanga thihna 50% a titlem thei nia hriat a ni a, hemi hun chhung hi golden hour tih a ni)

He Scheme hnuaiah hian National Highway, State Road leh khawchhung kawng eng pawha chetsualna tawkte chu chensualna a thlen atanga ni 7 chhung atan, cheng nuai khat leh singnga thleng cashless-in enkawlna pek theih an ni ang. He Scheme hi eDAR (Electronic Detailed Accident Report) platform leh Transaction Management System (TMS 2.0) te nen thlunzawm tur niin, damdawi inte senso hi Motor Vehicle Accident Fund (MVAF) atangin pek an ni ang a, lirthei chetsualna thlentu chu Insure a nih chuan General Insurance Company te kaltlanga pek tur niin, hit-and-run leh insure loh case te chu Deputy Commissioner kaltlangin pek an ni ang.

Meeting-ah hian Serchhip District chhunga Scheme tihhlawhtlin dan tur te, Standard Operating Procedure (SOP) leh mipui hriattirna tur Awareness Campaign kalpui dan turte sawi ho a ni a, thil fel lo leh harsatna awmte sutkian nan Grievance Redressal Officer atan SDO (Sadar) ruat a ni. Serchhip district-ah he Scheme hi hlawhtling taka kalpui a nih theih nan tun thla chhung hian Police leh damdawi ina thawkte tan bik Training buatsaih tum a ni bawk.

Vawiin meeting-ah hian, Addl. DC Pi Dorothy Muansangi, Superintendent of Police Dhirendra Pratap Singh bakah Addl. SP, Sr. Chief Medical Officer, District Medical Superintendent, District Transport Officer, SDO(Sadar), SDC, DIPRO leh Officer-in-Charge, Serchhip Police Station te an tel a ni

Pr. No. 254/2026 (SCP) Dated Serchhip 9th September, 2026
Issued by District Information and Public Relations Officer; Serchhip District, Serchhip.