Press Release Dated Serchhip, the 2nd September 2026

Serchhip DC hoin MOVCD- NER Phase 4 kalpui dan thlirletna neih niin Tuikum FPC te hna thawh vilzui dan tur chungchang rel a ni

Dated Serchhip, the 2nd September 2026: Vawiin khan Serchhip District Deputy Commissioner Pu Paul L. Khuma hovin District Level Monitoring Committee (DLMC) for Mission Organic Value Chain Development for North Eastern Region (MOVCD-NER) thutkhawm neih a ni a, Tuikum Farmer Producer Company (FPC) te hna thawh vilzui dan tur chungchang leh Sawhthing leh Hmarcha vawn thatna tura Cornerstone Innovation te Project, ‘Integrated Ginger & Chilly Processing Unit,’ Tuikhiang, Thenzawl-a din tur chungchangte rel a ni.

DLMC Member Secretary Pu K. Laltlanmawia, Serchhip District Agriculture Officer (DAO) hnen atangin Serchhip District-a MOVCD-NER thawh lina (Phase 4) kalpui mek dante ngaihthlak a ni a, he Scheme kaltlang hian FPC te din niin, 75% subsidy leh thil dangte hmangin thawmchak thin an ni a; Mizoram-ah tun dinhmunah FPC 41 awm mekin, MOVCD-NER hnuaiah hian thlai thlan bik, Sawhthing, Hmarcha, Aieng te bakah Lakhuihthei leh Sapthei te chin thin a ni.

Meeting-ah hian Tuikum Organic FPC ten Collection & Aggregation Centre an din tur te, Integrated Pack House, Khawlailunga sakna tur atana sum ruahman cheng nuai 24.5 leh thlai thar phurhna tur Transport Vehicle (Pik-up) leina tur atana cheng nuai 10 ruahman te, dik taka hman a nih theih nana vilzui dan tur chungchangte rel niin, committee chuan District Agriculture Officer kaihhruai Monitoring Team din ni se, uluk taka vilzui ni se tiin a rel a ni. Tuikum Organic FPC te hi Chhingchhip-ah hmunpui (headquarters) neiin khaw 15 an cover mek a, chungah chuan farmers 500 awmin lakhuithei leh sapthei an ching a ni.

Vawiin thutkhawmah hian DLMC chuan Sawhthing leh Hmarcha vawn thatna tur atana Cornerstone Innovation te Project, ‘Integrated Ginger & Chilly Processing Unit,’ Tuikhiang, Thenzawl-a din tur chu an pawmpui (approve) bawk a; he technology hi Mizorama hmasa ber tur niin Project Cost hi 1.85 Cr a ni a, Storage Capacity hi 900MT niin Processing Capacity hi 60MT a ni a; Cornerstone Innovation CEO Pu Zosangliana Chhakchhuak chuan kumin November thla velah zawh fel theih an inbeisei thu a sawi.

DLMC meeting-ah hian Serchhip District-a Ginger FPC din a nih ve theih nan chak zawka hma lak tura rel a ni bawk.
Vawiin meeting-ah hian line department hrang hrang – Fisheries, Horticulture, ATMA, AH&Vety, Cooperation, Agriculture leh FPC service provider Clover Organic Pvt. Ltd aiawhte an tel a ni.

Sawrkar laipui chuan MOVCD-NER scheme hi kum 2015-2016 atang khan hmarchhak State te tan a kalpui tan a. Central Sector Scheme niin kuthnathawktute’n hlawk zawk leh awmze nei zawka Organic farming an kalpui theihna tur te, thlai thar sawngbawlna leh hralhna tha zawk a awm theihna turtea hma lakna a ni.

Pr. No. 247/2026 (SCP) Dated Serchhip 2nd September, 2026
Issued by District Information and Public Relations Officer; Serchhip District, Serchhip.