Press Release Dated Serchhip, the 31st August 2026
Serchhip-ah District Level Narco Co-ordination Centre (NCORD) Meeting neih a ni
Dated Serchhip, the 31st August 2026: Vawiin khan Serchhip DC’s Meeting Hall-ah Deputy Commissioner Pu Paul L. Khuma kaihruaiin ‘25th NCORD Meeting’ neih a ni a, NCORD meeting hnuhnung ber 25th June 2026 atanga tun thlenga hmalaknate thlirlet niin hmalak zel dan turte rel ho a ni.
Sub-Divisional Police Officer (SDPO) Pi Lalrinzuali tarlan danin Serchhip Police te chuan NCORD Meeting hmasa (June 25) leh tun inkarah ruihhlo kaihhnawihah mi 7 manin, zu litre 918.5 an man a; BSF te nen joint patrolling neiin Lungkawlh (border area)-ah heroin hawng 91 zet an man bawk. August thla laihawl atangin ni tinin zirna in leh hmun hrang hrang-ah Anti-Drug Awareness Campaign, mi 1300 chuangte hnenah hlawhtling taka neih a ni bawk a. Capacity Building programme te buatsaih niin, NCORD hnuaia din Special Investigation Team (SIT) te chuan ruihhlo hluarna hmunahte joint patrolling nei thinin, Sunday ni leh zan tinin ruihhlo vaih hna an thawk thin bawk a, heng bakah hian vaihlo leh ruihtheih thil dangte do nan zirna in hrang hrangah thla khatah vawi 2 surprise check neih thin niin, naupangte zirtirna atan Reel insiamsiak te buatsaih a ni bawk.
Excise Department ten NCORD meeting hmasa leh tun inkarah Heroin gram 0.76 leh Alprazolam gram 90.3 (645 tablets) zet, Serchhip Chhim veng leh Dinthar venga chengte hnen atangin an man bawk. Food and Drugs Administration (FDA) te chuan dan phal loha damdawi hralh chhuak damdawi dawr 2 license an suspend sak bawk a, damdawi dawr 6 warning pek niin dawr 13 te insawifiah turin show cause notice an pe bawk.
Ruihhlo do a nih rual hian ruihhlo ngaite chhawmdawl hna thawh reng a ni bawk a. Health department chuan Serchhip district chhunga school hrang hrang 9-ah vaihlo, ruihhlo leh HIV chungchangah awareness programme an buatsaih a; District Hospital Serchhip-a doctorte’n District Jail tlawhin mi tang damlo 62 zet enkawl an ni bawk. September atangin thla tinin Jail hi an tlawh bawk dawn a ni.
Heng bakah hian Serchhip Sub-Headquarters YMA Anti-Drug Squads te thawhpuinain zu litre 151, Heroin hawng 9, Pregabalin strip 72 man ni bawkin, inhnamhnawih mihring 12 leh motor pakhat hren a ni bawk.
Bawrhsap Pu Paul L. Khuma chuan damdawi zuartu leh dan lova damdawi hralh thin dawrte pawh chhui zui zel an nih tur thu a sawi a, kalkhawmte chu thawh hona tha taka vawng nung zel tura fuihin hun hi a khar a ni.
Pr. No. 244/2026 (SCP) Dated Serchhip 31st August, 2026
Issued by District Information and Public Relations Officer; Serchhip District, Serchhip.
