Press Release Dated Serchhip, the 19th August 2026

Minister Prof. Lalnilawma hovin Serchhip-ah ‘National Space Day 2026’ lawm a ni

Dated Serchhip, the 19th August 2026: Vawiin khan Serchhip DC Pisapui Hall-ah India-in thla leilunga hlawhtling taka thlalem, Chandrayaan-3 a tumtir hriatrengna ni ‘National Space Day (NSpD)’ hman a ni a, RD&AD Minister Prof. Lalnilawma’n khuallian niin hun a hmanpui a, MIRSAC Member Secretary Pu F. Lalramchuana’n he ni lawmna inkhawm hi a kaihruai a ni.

Khuallian Prof. Lalnilawma chuan hetiang programme huaihawt a ni chu lawmawm a tih thu a sawi a. Tunlai khawvelah Space Science chu ram hmasawnna innghahna pawimawh tak a nih thu sawiin Mizoram sawrkar pawhin ruahmanna (plan) a siamna kawng hrang hrangahte pawh MIRSAC te data nasa taka hman a nih tawh thu leh hmanraw pawimawh ber ber an nih tawh thu a sawi.

Zirlaite fuihna thu sawiin ‘India chu Space Science-a theihna sang tak nei, thlaa Satellite tumtir thei ram 4-na kan nih mai bakah, thla chhim lam (southern polar region-a) tumtir thei hmasa ber kan ni’ a ti a, heng India-in theihna sang tak a neihte hi a hman tangkaina kawng hrang hrangte zir a, Mizoram tana tangkai taka hmang thei turin, he huna kalkhawmte Science & Technology mite leh zirlaite chu Space Science zirna kawngah nasa lehzuala ke pen turin a fuih a ni.

MIRSAC Member Secretary lo ni tawh, Pu K. Lalrammuana chuan khawtlang leh ram tana vansang thiamna (space technology) pawimawhna leh hman tangkai dante a sawi a, ISRO hmunpui Bengaluru atanga lo kal, Dr Renuka Agarwal, Scientist SG pawhin thu sawiin, NESAC atanga lo kal, Dr Rocky Pebam, Scientist SF hnen atangin NE state hrang hranga NSpD hman dan report ngaihthlak a ni bawk.

Vawiina NSpD lawmna pual hian Serchhip khawpui chhunga High School zirlai naupangte tan Quiz buatsaih a ni a, he intihsiakna-ah hian Marian high School chu pakhatna niin, Goodwill English Academy chu pahnihna an ni a, Govt. PCR High School chu pathumna an ni.

NSpD lawmnaah hian Meet the Scientist tih hun hman ni bawkin zirlaite tan Scientist-te kawmna hun buatsaih a ni bawk a; heng bakah hian Audio Visual show leh Exhibition Display te neih ni bawkin, MIRSAC-in vansang thiamna hmanga Mizoram leh Serchhip district hmun hrang hrang an zirchiannate pholan a ni bawk.

Kum 2023 August 23-a India-in thla leilung chhim lama a thlalem kahchhuah, Chandrayaan-3 chu hlawhtling takin a tumtirna hriat reng nan, India sawrkar chuan August 23 hi National Space Day atan puang a. ISRO bultumin kum 2024 atang khan kum tinin, August thla tir atangin India ram pumah hman thin a ni a. Mizoramah pawh NESAC leh MIRSAC kaihhruaina hnuaiah district hrang hrangah hman thin a ni.

Pr. No. 223/2026 (SCP) Dated Serchhip 19th August, 2026
Issued by District Information and Public Relations Officer; Serchhip District, Serchhip.