Press Release Dated Serchhip, the 29th June, 2026

SERCHHIP DISTRICT-A KHUALZINTE HMUN PAWIMAWHA SINGLE-USE PLASTIC HMAN KHAPNA LEH HMALAK ZUI DAN TUR CHUNGCHANG REL A NI

Dated Serchhip, the 29th June, 2026: Vawiin khan Serchhip District Bawrhsap Pu Paul L. Khuma hovin Serchhip Dsitrict chhunga khual zinte tlawhzin (Tourist Site) hmun pali – Vety Farm Dilpui, Vantawng Khawhthla, Tuirihiau leh Golf Course & Resort hmunahtea tawihthei lo Plastic Bawlhhlawh (Single-use) hman khapna dan leh hmalak zui dan tura ruahmanna ‘Action Plan’ chungchang sawi ho a ni.

Serchhip District Bawrhsap Pu Paul L. Khuma chuan bawlhlawh sawngbawl dan chu Sawrkarin a ngaih pawimawh thu sawiin, felfai leh hrisel taka heng hmunhmate hi vawn a nih theihna turin mipuite, khawtlang hruaitute leh sawrkar tanrual a pawimawh takzet thu a sawi a, serchhip district mipuite chu faina kawnga theih tawp chhuahpuiah a sawm a ni.

Vawiin meeting-ah hian SDC Pu Vanthangpuia’n Serchhip Deputy Commissioner Office-in ruahmanna ‘Action plan’ an siamte sawizauna a neih hnuin sawi hona neih zui a ni a; heng hmun pali – Vety Farm Dilpui, Vantawng Khawhthla, Tuirihiau leh Golf Course & Resort te chu Single-Use Plastics Free Zone-a puan a nih tur thu te, dan kenkawh dan turte leh dan bawhchhetute hremna tur chungchangte, mipuite’n an hriattur tarlanna (hoarding) siam dan tur te, July thla chhunga hmalakna tur hrang hrangte sawi ho niin, chak taka bawhzui nghal tura rel a ni.

Meeting-ah hian Additional Deputy Commissioner Pi Dorothy Muansangi bakah, line department hrang hrang – DUDO, BDO (Serchhip), SDO (Civil) Thenzawl, DIPRO, Police, Tourism, AH&Vety department hotute leh, Thenzawl South leh Buangpui VC hruaitute, Kanan Veng & Farm veng Branch YMA hruaitute an tel a ni.

Pr. No. 175/2026 (SCP) Dated Serchhip 29th June, 2026
Issued by District Information and Public Relations Officer; Serchhip District, Serchhip.