Press Release Dated Serchhip, the 23rd June 2026

SERCHHIP DISTRICT TASK FORCE COMMITTEE ON IMMUNIZATION THUKHAWM

Dated Serchhip, the 23rd June 2026: Vawiin khan Serchhip District chhunga hri danna (vaccine) lak dan tur chungchang ngaihtuahin District Task Force Committee on Immunization chu Serchhip DC Meeting Hall-ah an thukhawm a, Additional Deputy Commissioner Pi Dorothy Muansangi’n he thutkhawmna hi a kaihruai ni.
Vawiin meeting-ah hian tunlaia Pakistan leh a chhehvela hri leng mek Zeng hri (Polio) laka lo invenna tura July 1 -3, 2026 chhunga vaccination/immunization kalpui dan tur te, Chhul hmawr Cancer venna HPV Vaccine chungchang te, Routine Immunization leh Serchhip Distirct dinhmun hrang hrangte thlirletna leh tunhnaia Mizoram thenawm Bangladesh rama Sentut/Sentet (measles/Rubela) hri leng mek chungchang leh invenna (vaccine) lak a pawimawhzia te, mipuite him nan uar leh zuala hri danna lak a nih theih nana thawh hona tha lehzual a awm theih dan turte sawi ho a ni.

Chief Medical Officer Dr. Lallawmpuii chuan tunlaiin India thenawm ram Pakistan leh a chhehvelahte Polio hri a len nasat thu sawiin, he hri hi India ramah um bo lo ni tawh mah se, darh leh thei a nih avang leh he hri laka kan fihlim (free) reng theih nan Universal Immunization Programme (UIP) hnuaiah July 1 – 3, 2026 chhungin Serchhip district hmun hrang hrangah ngawrh taka Vaccine lakna beihpui kalpui tur a nih thu a sawi a. India ramah chhul hmawl cancer a hluar thu sawiin HPV Vaccine lak pawimawhzia leh chhul hmawr cancer avang hian India ramah minute khat tlinglo chhunga mi pakhat an thih ziah thu a sawi bawk. Private Hospitalah HPV Vaccine lak nan cheng sang thum atanga singkhat bawr velte insen ngai thin chu UIP programme hnuaiah naupang kum 14 pum tawh, 15 la tling lote tan a thlawna lak theih a nih thu a sawi bawk.

Deputy Chief Medical Officer Dr. Lallawmkimi Chhakchhuak-in Polio Vaccine inpek dan tur, Intensified Pulse Polio Immunization (IPPI) Serchhip district-a kalpui dan tur hrang hrangte sawiin, July ni 1-ah hmun hrang hrangah Vaccine pekna tur hmun siam tur niin chung hmun ruatahte chuan nausen (0-59 months) te chu an chhungte’n hruaiin Oral Polio Vaccine eitir tur an nih thu a sawi a. July ni 2 – 3 chhungin in tin tlawh kualin Polio Vaccine pek beihpui thlakna neih tur a nih thu a sawi bawk. Heng bakah hian tunlaia Bangladesh-a Sentut hri leng mek avanga mipuite fimkhur a ngaih thu sawiin Routine Immunization ngaih pawimawh a tul thu leh Serchhip district dinhmunte a tarlang bawk.

Additional DC Pi Dorothy Muansangi chuan heng hri danna (vaccine) pawimawh tak takte hi a latu turte’n tha taka an lak a, mi tumah pek hmaih an nih lohna turin, sawrkar department-te leh khawtlang hruaitu leh mipui zawng zawngte tanrual a pawimawh thu sawiin, thawhhona tha tak nei turin Serchhip district mipuite a sawm a ni.

Pr. No. 169/2026 (SCP) Dated Serchhip 23rd June, 2026
Issued by District Information and Public Relations Officer; Serchhip District, Serchhip.