Press Release Dated Serchhip, the 1st June 2026

SOLID WASTE MANAGEMENT CHUNGCHANGAH SERCHHIP DISTRICT SPECIAL CELL THUKHAWM; SWM RULES 2026 CHAK TAKA KENKAWH A NI DAWN

Dated Serchhip, the 1st June 2026: Vawiin khan bawlhhlawh sawngbawl dan Solid Waste Management (SWM) chungchangah Serchhip District bawrhsap Pu Paul L. Khuma hovin Special Cell an thukhawm a, May ni 5, 2026-a SWM chungchanga Supreme Court thuchhuakte bawhzuiin, bawlhhlawh sawngbawlna kawnga hmalak meknate enletna leh sawi hona neih a ni.

Deputy Commissioner Pu Paul L. Khuma chuan Serchhip District chhungah bawlhhlawh sawngbawl kawngah SWM Rules, 2026 tlawhchhana chak taka hma lak mêk a nih thu a sawi a. SWM Rules ngai pawimawh lo leh zâwm lote chu Supreme Court thuneihna dodal anga ngaih an nih dâwn avangin, dan bawhchhetute chunga hremna pawh khauh taka kenkawh a nih tur thu a sawi a. Mipuite chu faina kawnga thahnemngai tur leh dan ngai pawimawh turin a chah a; he danin a phut anga mawhphurhna neitu khawtlang hruaitute leh department zawng zawngte pawh, tha taka an mawhphurhna theuhte hlen chhuak turin a sâwm bawk a ni.

Vawiin thutkhawmah hian Serchhip District khaw hrang hranga bawlhhlawh sawngbawlna kawnga hmalatu tur – Village Solid Waste Management Committee (VSWMC) indin chungchang te, Village Council (VC)-te mawhphurhna leh Special Cell hnuaia department hrang hrangte hmalak mêk dante en ho a ni a, hmalak zui zel dan turte rel a ni bawk.

SWM Rules, 2026 hnuaiah hian bawlhhlawhte chu chi li (4) – Wet Waste (tawih thei), Dry Waste (tawih thei lo), Sanitary Waste (zun leh ek thiarna thil hrang hrang, diaper leh sanitary pads etc.) leh Special Care Waste (rawng bur, damdawi chhia, e-waste etc.) ahte thlair hran tawh tur an ni a. Hmun hrang hrangah tawihthei leh tawih thei lo paihna tur Waste Segregation/Management Center-te sak mek a ni a. A paihna tura hmun bik ruahmanahte chauh hian bawlhlawh paih tur a ni dâwn a, khawlaia bawlhhlawh hal leh paih chu khap tlat a ni dawn bawk a ni.

Pr. No. 142/2026 (SCP) Dated Serchhip 1st June, 2026
Issued by District Information and Public Relations Officer; Serchhip District, Serchhip.