Press Release Dated Serchhip, the 22nd April 2026

GYAN BHARATAM MISSION CHUNGCHANGAH DISTRICT LEVEL COMMITTEE THUTKHAWM HMASABER NEIH A NI

Dated Serchhip, the 22nd April 2026: Vawiin khan Serchhip District Level Committee on Gyan Bharatam Mission chu, an Chairman District Bawrhsap Pu Paul L. Khuma hovin DC Meeting Hall-ah an thukhawm a, Ministry of Culture kaltlanga India ram pum huapa kut 33ziak (manuscript) hluite zawn chhuah leh vawn that (digitalized) kawnga hmalakna kalmek chungchang sawi ho niin, Serchhip District-a hmalak dan tur hrang hrangte sawi ho a ni.

Meeting-ah hian Pu C. Lalmuanpuia, Art & Culture Department, Aizawl atanga lokal chuan Gyan Bharatam Mission thil tum sawiin, pi leh pute sulhnu, an kutziak (khawlchhut ni lo) hrang hrangte an riral mai loh a, vawn that tlat an nih theihna tura hmalakna a nih thu a sawi a, tunah hian ‘zawn chhuah (identification)’ hna thawh mek a nih thu leh awlsam zawka he hna thawhna tur atan hian ‘Gyan Bharatam Mobile Application’ siam a nih thu sawiin, mi tu pawh, mimal leh pawl emaw, thu ziak hlui report tur neite chuan he Mobile Application kaltlang hian an theh luh theih vek thu a sawi a. Mipuite’n he Application hi kan hmelhriattlan deuh deuh a pawimawh thu sawiin heng Manuscript-te hi a neitute remtihna thlapin uluk taka thla lak a, a Soft Copy chauh vawnhim tura lak tur niin, a tak (original) chu a neitute kutah a awm zui zel tur thu a sawi bawk.

Tun dinhmunah Mizoram chuan Mobile Application kaltlang hian survey request – 2, Manuscript – 28 nei mekin, N.E state-ah Manuscript report la nei tlem ber kan nih thu a sawi a, report tam zawk nei tura tan lak a ngaih thu a sawi bawk.

Vawiin meeting-ah hian Serchhip khaw chanchin hria leh thu leh hla lama mi ril, Pu Lalhmangaiha Chawngthu te, Govt. Serchhip College atangin Assistant Professor pahnih Pu K. Lalrinchhana leh Pu Laldinpuia te an tel bawk a. Hmalak dan tur hrang hrangte sawi ho a nih hnuin Bawrhsap Pu Paul L. Khuma chuan mizote thu ziak hlui zawn chhuah hna thawk tur hian, Serchhip District-a khaw hrang hranga khawtlang hruaitute leh sawrkar hotute nen thawh hona tha neih a pawimawh tur thu leh chak taka hma lak zui a nih tur thu sawiin hun hi a khar a ni.

Gyan Bharatam Mission hi kum 2025 – 2031 inkar chhunga kalpui tur a ni dawn a. Mizoram-ah State Level Committee leh District Level Committee te chu April 1, 2026 khan din ni tawhin, Art & Culture Department chu State Nodal Department a ni a. Tunah hian district tinah Awareness Campaign hna thawkin an feh chhuak mek a ni.

Pr. No. 111/2026 (SCP) Dated Serchhip 22nd April, 2026
Issued by District Information and Public Relations Officer; Serchhip District, Serchhip.