Press Release Dated Serchhip, the 13th March, 2026
Serchhipah Chapchar Kut 2026 lawm
Dated Serchhip, the 13th March, 2026: Vawiin khan Serchhip Leisekawt Mualah Chapchar Kut, 2026 hlim taka hman a ni a. Rural Development Minister Prof Lalnilawma chu Kut Pa niin DC Pu Paul L Khuma chu Kut Thlengtu a ni.
Kut Pa Prof Lalnilawma chuan Mizote kut zinga ropui ber Chapchar Kut hmang tura kalkhawmte chibai bukin hlim taka hmang turin duhsakna a hlan a. Chapchar Kut hi zo nun ze mai chawisanna a nih bakah Mizo culture, mizo thuam, hnam lam leh zai te chawi nunna hun remchang a ni, a ti. Minister chuan kumin Chapchar Kut thupui Zo Nun Ze Mawi – Inremna chu a sawia sawi aiin a taka nunpui tur a ni, a ti a. Ram leh khawtlang hmasawnna tura hma an laknaah pawl hrang hrang te inrem tur te, policy hrang mahse political party te pawh inrem tur leh doctrine in ang lo nei kohhran hrang hrang te pawh inrem turin a sawm a. Serchhip chu ziak leh chhiar thiam tamna District an nih angin zirna uar turin a sawm bawk a ni.
Kut Thlengtu DC Pu Paul L Khuma chuan kumin Chapchar Kut thupui Zo Nun Ze Mawi – Inremna a nih ang ngeiin huatna aiah hmangaihna, rinhlelhna aiah rinna, manganna aia lh beiseina, thinrimna aiah lungawina, thim aiah eng, innghirnghona aiah inremna kan zavaia kan neih theih nan an rilru te buatsaih turin a fuih a. Hlim taka Chapchar Kut hmang turin kalkhawmte a sawm a ni.
Hun khatna, Additional DC Pu Lalrinzuala, Chapchar Kut Working Chairman kaihhruaiah hian Mizo hnam lam leh zai chi hrang hrang en leh ngaihthlak a ni. Serchhip Town Branch YMA ten Cheraw kanpui an entir a. Sub MHIP Sub Headquarters YMA Cultural Troupe, Govt Serchhip College Phunchawng Cultural Club, MHIP Sub Headquarters leh YMA Chhang ten hnam lam chi hrang hrang mawi tak tak an entir a. Mal zai leh zaipawl zai ngaihthlak tur a awm bakah Govt Serchhip College ten Mizo hnam inthuamin fashion show leh lemchan tawi hmuhnawm tak an entir a. Chapchar Kut chhimtu zawng zawng te hlim takin an Chai ho a ni.
Chapchar Kut lawmnaah hian Miss Chapchar Kut 2026 atan Lalhlupuii Chhangte, Kawnpui North chu thlan a ni.
Hun hnihnaah hian concert neih a ni a. Aizawl atanga zaithiam lo kal bakah Serchhip MZI leh MDM member zaithiam tak tak ten mipui kalkhawmte an awi a ni.
Chapchar Kut 2026 Leisekawt Muala neih chhung hian Mizo Thang chi hrang hrang 14 – thangthleng, thangpui, vaithang, beai, khaileng, sahdal, thangchep, kar, fal, mangkhawng, hnawhtawt, kawlper, vawm tlak leh aiawt te chu mipuite entheih turin pho chhuah a ni a. Mual sirah Commerce & Industries buatsaihin stall chi hrang hrang 10 hawn a ni bawk a. CM Special Package dawngtu 3, PMVK beneficiary 1 bakah khawtual mi thiamhnang deh lam thiam 6 ten mipuite lei theih turin dawr an hawng a ni.
Pr. No. 76/2026 (SCP) Dated Serchhip 13th March, 2026
Issued by District Information and Public Relations Officer; Serchhip District, Serchhip.
