Press Release Dated Serchhip, the 20th January, 2025
Serchhipah PM Vishwakarma Scheme chungchang inhrilhhriatna hun hmang
Dated Serchhip, the 20th January, 2025: Sawrkar Laipui hmalakna PM Vishwakarma Scheme chungchang inhrilhhriatna hun chu vawiin khan Serchhip DC Pisapui Hall-ah neih a ni a. Bawrhsap Pu Paul L Khuma chuan khuallian niin he hun hi a hmanpui a ni.
DC Pu Paul L Khuma chuan Pathianin mihringte talent nei theuhin min siam a, Pathian min pek kut themthiamna kan neih hmang hian eizawnna hlawk zawk a neih theih tih hriain PM Vishwakarma hi duan a ni, a ti. Tunlai khawvel inher zelah pawn lam thil lakluh aiin kan culture leh tradition mila keimahni kutchhuak ngaihhlut nachang kan hriat belh zel a; chuvangin, keini pawhin kan intahhriam leh zuala, eizawnna hlawk zawk nei tura kan thiamna kan tihpun a tul a ni, DC chuan a ti a. Anmahni mai bakah hetiang lama tui mi an thiante pawh hrilhhre turin kalkhawmte a chah bawk. Loan chungchang sawiin Pu Paul L Khuma chuan sawrkar scheme kaltlanga an loan hmuh te rinawm taka rul thin turin a fuih a. An rul tha lo a nih chuan anmahni tan leh an thiante tan loan dilna kawng an tlawh ping thei a ni, a ti.
Pu Samrat M. Jha, Assistant Director Gr-I i/c Br. MSME, Mizoram State bialtu chuan kalkhawmte lawmna thu sawiin, PM Vishwakarma Scheme chungchang a sawifiah a. India ram mipuiten hmasang atanga thiam thil an lo neih tawh, kutthemthiamna chi hrang hrang chu eizawnna tlaka hmang tur leh, an khawsak dinhmun chawikan a nih theih nana duan a nih thu a sawi a ni.
Vawiin programme-ah hian Lead District Manager Pu Lalnghawrliana; Pi Zirthangpuii, Domain Expert, PMV, Serchhip District; Pu Lalhmangaihtluanga, DLRP, Serchhip District Commerce & Industries leh Pi Vanlalmawii, Executive, India Posts Payment Bank (IPPB) te pawhin thu an sawi a ni.
Ministry of Micro, Small & Medium Enterprises (MSME), Ministry of Skill Development & Entrepreneurship (MSDE) leh Department of Financial Services (DFS) hnuaia kalpui PM Vishwakarma hi Central Sector Scheme a ni a. Mizoramah chuan Commerce & Industries Department-in an enkawl a ni. He scheme hnuaiah hian kum 18 tling tawh, kutthemthiam, sawrkar hnathawk ni lo chhungkua atangin mi pakhat theuh inziahluh theih a ni a. Thiam thil zir thar tur te tan ni loin, Sawrkar Laipuiin a pawm traditional trade 18 a tarlan zinga a engemaw bera thiamna nei sa te tana buatsaih a ni a. He scheme a inziaklutte hi an thiamna tipung tur te, eizawnna hlawk zawk an neih theih nan te, internet kaltlanga sumdawn dan (digital marketing) inkawhhmuh nan te leh sum leh pai pei pun dan an thiam theih nan training pek thin an ni a. A pung hniam zawkin Loan cheng nuai thum thleng an lak theih bakah eizawnna bungraw pawimawh (mistiri bungrua etc) a thlawna pek an ni bawk.
Pr. No. 16/2026 (SCP) Dated Serchhip 20th January, 2026
Issued by District Information and Public Relations Officer; Serchhip District, Serchhip.
