Press Release Dated Serchhip, the 17th December, 2025

Speaker Pu Lalbiakzama’n Kawlni Filling Station a hawng

Dated Serchhip, the 17th December, 2025: Vawiin khan Mizoram Legislative Assembly Speaker Pu Lalbiakzama chuan Serchhip Sailiam hmuna Kawlni Filling Station chu a mamawhtu apiangte tana hman theih turin a hawng. Hawnna inkhawmah hian Serchhip DC Pu Paul L Khuma chu khual zahawm a ni.
Khuallian Pu Labiakzama chuan Mizoram laili Serchhipah petrol pump thar hawn a ni ta chu lawmawm a tih thu sawiin, Serchhip leh a chheh vel khaw mipuite tan ni chhinchhiahtlak tak a ni, a ti. All Mizoram Petroleum Dealers’ Association (AMPEDA) a Vice President ni mek Pu Lalbiakzama hian an pawlin Mizoram mipuite tana malsawmna nih chu an tum ber a nih thu te, bukna dik lo leh tehna dik lo an duh lohzia te leh, oil chungchanga mipuiten harsatna an neih chuan thuneitute hnena thlen thuai thin turin a chah a. Thil dik lo a awm a nih chuan chinfel thuai thuai an duh a, chingfel turin thuneitute beng a thlen a ngai thin tih sawiin Consumer hruaituten chu chu lo hriaa, lo ngaihvenpui thin turin a ngen bawk. Oil mamawhna pung tual tual karah petrol pump nei tura sawrkar dan leh dun paltlang ngai a tam zia te, permit hrang hrang lak tur a tamzia te sawiin, hetiang sumdawnna kalpui thei tur hian a kawng a thui em em a ni, Speaker chuan a ti a. Pu Lalnghinglova te chhungkua chu chhungkaw chhuanawm leh tangrual, hlawhtling tura bei nasa an ni tih sawiin, fakawm a tih thu leh lawmpuiawm a tih thu a sawi a ni.
Khual zahawm, DC Pu Paul L Khuma chuan Kawlni Filling Station hawn thar chu mipuite tana malsawmna ni thei se a duh thu a sawi a. A neitu Kawlni chhungkua te pawhin dikna leh rinawmna nen he pump hi kalpui turin a chah a, duhsakna a hlan a ni.
Kawlni Filling Station (Bharat Petroleum Corporation Ltd) hi Serchhip khua Pu Lalnghinglova Kawlni te chhungkaw ta niin Serchhipa petrol pump pahnihna a ni a. Mizoramah chuan Bharat Petroleum Corporation Ltd hnuaia petrol pump 14 na a ni. Serchhip Sailiam, Thenzawl Road hrulah a awm a. Pastor K Lalhmangaihzuala’n Pathian hnena hlanna a neih zawhah khuallian Pu Labiakzama’n a hawng a ni.
Vawiin programme ah hian AMPEDA President Pu K Lalnghakliana chuan oil depot nei tura an hmalakna kal mek a sawi a.
Ani bakah hian Serchhip District Consumers Association, Bharat Petroleum Corporation Ltd, Serchhip District Zoram Drivers Union aiawhte pawhin thu an sawi a. Pu Lalruatsanga Kawlni leh Pu Lalnghinglova Kawlni ten lawmthu sawina hun an hmang a. Pastor Challiandinga’n tawngtainain hun a khar a ni.

Pr. No. 395/2025 (SCP) Dated Serchhip 17th December, 2025
Issued by District Information and Public Relations Officer; Serchhip District, Serchhip.