Press Release Dated Serchhip, the 15th December, 2025

February, 2026 ah Serchhip District pum huap Camping buatsaih dawn

Dated Serchhip, the 15th December, 2025: Nasha Mukt Bharat Abhiyan (Drug Free India) hmalakna kal mek bawhzui nan Serchhip District ah February, 2026 hian ruihhlo ngaite pual chhandamna camping buatsaih turin ruahmanna chak takin a kal mek a. Vawiin khan Serchhip Additional DC Pu Lalrinzuala, Organising Committee Chairman ni bawk hoin DC Meeting Hall ah thutkhawm pawimawh neih a ni.
Ruihhlo ngaite puala camping hi February ni 9, 2026 (Thawhtanni) atanga tanin February ni 20 (Zirtawpni) thleng neih tura ruahman niin, tum khat chauh camping hi neih a ni dawn a. Speaker atan Frederick Lalrindika (Bethel Ministry) chu ruatfel niin New Serchhip Presbyterian Kohhran Biak Inah nghah a ni ang. Follow up programme hi New Serchhip Biak Inah vek hian neih ni se, February ni 21 atanga 22 thleng, mipui a duh apiang chhim theihin buatsaih ni se, tiin vawiin meeting chuan a rel a ni.
Serchhip District chhung khawi khua atang pawhin zu leh ruihhlo ngai, a mamawhtu apiang he camping-ah hian luh theih a ni dawn a. Kohhran belh bik nei loin Organising Committee ah hian Serchhip Town chhunga kohhran hrang hrang 16-a hruaitute, sawrkar hnathawk te leh tlawmngai pawl zawng zawng aiawhte an tel a ni.

Pr. No. 393/2025 (SCP) Dated Serchhip 15th December, 2025
Issued by District Information and Public Relations Officer; Serchhip District, Serchhip.