Press Release Dated 19th November 2025
Sardar @150 kawngzawh Serchhipah
Dated Serchhip, the 19th November, 2025: Serchhip DC Pu Paul L Khuma hoin vawiin khan Serchhipah Sardar @150 Unity March huaihawt a ni a. Government Higher Secondary School, Serchhip atangin Serchhip Bawrhsap Pisapui thleng kawng an zawh a ni.
Unity March hi Government Higher Secondary School atanga chhuakin Leisekawt Field ah cultural programme an hmang a. Kawng zawh bultan puitu Serchhip SP Pu Gavit Gogna chuan Unity March an neih chhan sawiin India ram chu ram bung hrang hrang, lal hrang hrangin an thut thin, princely state tam tak a inthendarh an ni a, tuna India ram kan hriat tak hi British Sawrkar laka India a zalen hnua piang a ni, a ti. Princely State tam tak a inthendarh te chu Sardar Valabhai Patel-a leh ram hruaitu hmasa te hmalaknain India ram bung khatah chhun khawm an ni a, tuna India ram kan tih a lo pian theihna tura mi pawimawh ber te zinga mi a nih avangin a piancham vawi 150na ah he hun ropui tak hi kan hmang a ni, SP chuan a ti.
Unity March-ah hian Faina Beihpuithlak nghal a ni a. District Urban Development Officer (DUDO) Pu Vanlalhriatpuia chuan faina leh thianghlimna a taka nunpui a tulzia sawiin zirlai te a fuih a. Kawng zawhtu zawng zawng te hian kawng tluanin bawlhhlawh an chhar fai a, fai inzirtirna leh faina hnatlang inkawp an nei nghal a ni.
Sawkar hnathawk, school naupang leh mipui thahnem tak he kawng zawhah hian an tel a. A tawp kharna programme hi Serchhip DC Office tualzawlah neih niin DC Pu Paul L Khuma chuan thu a sawi a. Engkimah thawhhona tha leh tanrualna a pawimawhzia te; chhungkua, kohhran, sawrkar leh hnathawhna hmunah te inlungrualna, inpumkhatna leh tanrualna pawimawhzia te Unity March atang hian zir chhuak turin mipuite a sawm a ni.
Leisekawt Field ah leh Serchhip DC Office tualzawlah hian thusawi ngaihthlak a nih bakah Mizo hnam lam chi hrang hrang Serchhip Sub Headquarters YMA Cultural Troupe ten an entir a. Pi F Lalruatmawii, Mera Yuva Bharat (MY Bharat) Serchhhip chuan lawmthu sawiin hun hnung a khar a ni.
Pr. No. 368/2026 (SCP) Dated Serchhip 19th November, 2025
Issued by District Information and Public Relations Officer; Serchhip District, Serchhip.
