Press Release Dated Serchhip, the 22nd August, 2025

Serchhip khawpui cheimawi dan tur thlirho

Dated Serchhip, the 22nd August, 2025: Vawiin khan Serchhip khawpui cheimawi dan ruahmanna leh hmalak mek dan te thlirhoin Serchhip DC Pu Paul L Khuma kaihhruaiin Serchhip DC Meeting Hall ah mi pawimawhte an thukhawm.
Serchhip khawpui chhung pengthuam pawimawh hmun sarihah signage lian tak tak phun a ni tawh a, hei aia te hret hi pengthuam dang pangaah phun belh leh tura ruahman a ni. Zebra Crossing hmun 45 ah siam tawh a ni a, kawngpui dungah leh hmun pawimawhah Serchhip cheimawina tur palm thing 300 dawn phun a ni tawh a, kea kalna foothpath hungnaah te pangpar pawt engemawzat tar a ni a, Serchhip Indoor Stadium bul kawng sirah Mizo Culture pholang thei tur tarmawi (mural) lian tak dah a ni tawh a, Helipad bulah park mawi tak siam mek a ni a, Street lamp post pawh phun ni tawhin kawtthler cheimawina atan lamp te khai a ni dawn bawk a ni.
Bialtu MLA, Chief Minister ni bawk Pu Lalduhoma fund atangin Water Vending Machine changkang tak dahna tur sum cheng nuai 5 hmuh a ni a, he khawl hian Serchhip a lo thleng tawh a ni. Serchhip khawpui hulum laia dah tur Pastor Chhawna lim (bust) hi siam zawh a ni tawh a. New Serchhipah leh bazarah te fountain dah tum a ni bawk a. Chhiahtlang leh Serchhip inkarah I Love Serchhip tih inziak dah tum a ni a, Chhiahtlang laili lai taka high mast ah thutmuanna hmun siam tum a ni a. Heng bakah hian hmalakna leh ruahmanna kal mek engemawzat a la awm bawk a ni.
Serchhip DC chuan Serchhip town area-a Village Council te, Florists Association te, NHIDCL Contractor te, Department hrang hrangten Serchhip khawpui cheimawina atana an sum leh pai, an tha leh zung nasa taka an seng chu lawmawm a tih thu a sawi a. District Level Beautification Competition lawmman cheng nuai 50 chauhin a daih sen loh thu te, ruahmanna kal mek hi cheng nuai 80 dawn a tlin tawh thu te, mihring tha nena chhut phei chuan senso a san tawhzia leh a la san belh turzia sawiin Pu Paul L Khuma chuan Serchhip Beautification Project hlawhtlinna chu mipuite leh sawrkar thawhhona vang a ni, a ti. Serchhip khawpui cheimawi hna thawh mek hi a puitlin hunah a enkawltu tur mipuite an pawimawh tih DC chuan a sawi a. Kan enkawl that loh chuan kum reilot ah hnawk leh tawpah a chang thei a ni tih hria a, uluk taka enkawl zui turin mipuite a ngen a ni.
Vawiin meeting-ah hian Serchhip Town area chhunga Village Council te, Serchhip Beautification Committee member te, official te leh mi pawimawh dangte an tel a ni.

Pr. No. 275/2025 (SCP) Dated Serchhip 22nd August, 2025
Issued by District Information and Public Relations Officer; Serchhip District, Serchhip.