Press Release (Dated Serchhip, the 15th July, 2025)

Serchhipah Independence Day lawm dan tur rel

Dated Serchhip, the 15th July, 2025: Vawiin khan Serchhip DC Pu Paul L Khuma hoin DC Meeting Hall-ah Serchhipa kum 2025 Independence Day lawm dan tur mi pawimawhten an rel.
Kumin Independence Day ah hian Minister Pu B Lalchhanzova chu khuallian a ni a nga. Serchhip Sports Complex-ah zing dar 10 ah programme tan a ni ang. Kumin hian march past-a tel tur zingah school contingent 14, scouts and guides, NCC leh Ex-Servicemen te tel thei tura beisei an ni a. Heng bakah hian Thenzawl Police Training School atangin armed contingent an tel theih beisei a ni bawk.
Serchhip DIPR Office chu Independence Day lawmna mipui a duh apiangin tv leh youtube kaltlanga an en theih nan live a pechhuak tura beisei an ni a. Hemi ni hian awlsam taka mahni awm hmun atanga tute pawhin Independence Day lawmna an chhim ve theih nan @diproserchhip youtube channel kaltlangin pek chhuah an tum a, youtube link hi a zau thei ang berin an thehdarh ang.
Hemi ni hian sawrkar office zawng zawng te chu zing atanga tlai thleng anmahni office theuhah hnam puanzar zar theuh tura hriattir an ni a. VIP’s at home hi Independence Day lawmna programme neih zawhah DC Bungalow ah neih a ni ang. Kum danga tih thin angin he ni pual hian Serchhipa Home, Hospital leh Jail ah te thilpek sem a ni leh ang a, Independence day pual Football Tournament leh Table Tennis Tournament neih a ni dawn bawk a ni.
Vawiin meeting-ah hian Serchhip District-a Office tin hotute bakah Village Council member te, tlawmngai pawl hruaitute an tel a ni.

Pr No. 224/2025 (SCP) Dated Serchhip 15th July, 2025
Issued by District Information and Public Relations Officer; Serchhip District, Serchhip.