Press Release Dated Serchhip, the 3rd July, 2025

Serchhip District Task Force for Immunization thukhawm

Dated Serchhip, the 3rd July, 2025: Vawiin khan Serchhip District Task Force for Immunization chu an chairman Serchhip Bawrhsap Pu Paul L.Khuma kaihhruaiin Serchhip DC meeting hall ah an thukhawm. He hunah hian District TB Forum leh Stop Diarrhoea campaign meeting neih chhunzawm nghal a ni.
Vawiin thutkhawmah hian Deputy CMO Dr Lallawmkimi Chhakchhuak chuan kum 2024-2025 a Serchhip District a immunization an kalpui dan a report a. Naupang immunization ah hian District pumpuia naupang za zela 96.24 tuam chhuah an ni a. Nu naupai 89.76% hnenah Tetanus danna leh Diphtheria danna inkawp TD vaccine pek an ni bawk. Kumin sawrkar kum kal mekah thla thum chhungin fully immunized 277 an awm tawh a. Vaccine pek chungchangah Serchhip District a hmalakna hi a tha thawkhat tih a lan thu leh sakhuana thil avanga harsa deuh chu awm mahse, a tlangpui thuin awareness a that tawk thu ngaihthlak a ni.
District TB Forum Meeting neih chhunzawm nghal niin Serchhip District ah December 7, 2024 atanga ni 100 chhung TB campaign neih chungchang thlir let a ni a. Hemi hun chhung hian Serchhip District Target 9863 a nih laiin TB vei thei dinhmuna ding (vulnerable population) mi 11,094 zet an endik hman a, 100% aia sang an hlen thei a ni. He campaign chhung hian Thenzawlah mipa 2, Chhiahtlangah mipa 1 TB vei an hmu chhuak a. 100 days hi zo tawh mahse TB screening hi neih chhunzawm zel a nih thu District TB Officer Dr Lallawmkimi Chhakchhuak chuan a sawi a ni.
TB Free Village siam tura thawhhona thuthlung Memorandum of understanding (MoU) hi Ministry of Panchayati Raj (MoPR) leh Central TB Division, Ministry of Health and Family Welfare (MoH&FW) ten July 8, 2022 ah an sign a. Village Council hrang hrang ten anmahni huamchhung a TB Free Village nei turin tan an la a. Mi 1000 khuaah 30 tal test tur an ni a. TB vei hmuhchhuah te chuan damdawi tha taka eiin hunbi kim leh dik thlapin an ei zo tur a ni a. Nikshay Poshan Yojana hmangin TB veite tan hamthatna leh tanpuina an dawn tur ang te kalpui a ni ngei em tih enpui tur a nih bakah TB vei te tana ei tur tha leh hrisel NiKshay Mitra hmangin pek thin a ni em tih enpui tur a ni a. VC/LC te tan kum khatah mi engzatnge test ngai tih chhut chhuah tur a nị a. Entirnan mi 10,000 ah chuan kumtinin mi 300 aia tam test an ngai dawn tihna a ni.
Serchhip District ah kum 2 a zawna TB Free Village ni thei Hmuntha chuan silver status an dawng a, a kum khatna atana TB Free Village ni thei 8 – Bungtlang, Lungpho, Ngentiang,
Lungkawlh, Sailulak, Leng, Khumtung leh Serchhip Field Veng te chuan bronze status an dawng bawk a ni.

Stop Diarrhoea Campaign kalpui mek a ni bawk a. District Hospital, PHC, Health and Wellness Centre, Sub Centre leh Clinic ah Oral Rehydration Treatment Corner dah theuh niin a mamawh tan Zinc leh ORS lak theih a nih thu meeting ah hian tarlan a ni.
Vawiin meetingah hian Serchhip District CMO Dr LP Malsawma bakah, Health Department officer te, Line Department officer te bakah khawtlang hruaitute an tel a ni.

Pr No. 205/2025 (SCP) Dated Serchhip 3rd July, 2025
Issued by District Information and Public Relations Officer; Serchhip District, Serchhip.