Press Release Dated Serchhip, the 20th June, 2025

UD&PA Secretary hovin Serchhipa bawlhhlawh sawngbawl dan tur chungchangah meeting nei

Dated Serchhip, the 20th June, 2025: Vawiin khan UD&PA Secretary Pu Lalmalsawma hoin UD&PA Officer ten Serchhipa bawlhhlawh sawngbawlna tur ruahmanna chungchang Serchhip Pisapui Meeting Hall-ah District thuneitute nen meeting an nei.
Secretary chuan District Beautification Committee hmalakna, department hrang hrang te nen an thawhhona te leh ruahmanna an siam te chhuanawm a tih thu a sawi a. Bawlhhlawh sawngbawl kawngah pawh model district an nih ngei a beisei thu a sawi.
Serchhip DC Pu Paul L Khuma chuan Serchhip District hmalakna hrang hrang sawiin a hmunah hmuhpui tura UD&PA thuneitute an lo kal chu lawmawm a ti a. District tana hmasawnna thil tam a thlen phah ngei a beisei tih a sawi a ni.
Serchhipah hian UD&PA hmalakna in Solid Waste Management Centre sakna tur ruahmanna a kal mek a. Hetih lai hian PHE, Serchhip District Urban Development Office leh mimal firm Greenherd Pvt. Ltd. te thawhhonain Serchhip Lungrual ramah bawhhlawh sawngbawlna hmun sak mek chu peihfel tep a ni tawh a. Hemi chungchanga private company lamin harsatna an neih te vawiin meeting-ah hian sawiho a ni a. Serchhip UD&PA Office te nen an thawhho dan tur ruahmanna te, Greenherd lamin sawrkar lama beiseina an neih te vawiin hian an sawiho a ni.
Meeting-ah hian District Beautification Committee hmalakna powerpoint hmanga sawifiah a ni bawk a. Meeting neih zawh hian NH-2 kawngpui kamah UD&PA hotute hian palm thing an phun nghal a. Serchhip Auditorium, District Hospital tur sak mek, Community park near helipad, New Serchhip South leh UD&PA Office te an tlawh bawk a ni.
Vawiin meeting ah hian Pu Jacob Lalawmpuia, Director, UD&PA; Pi C. Lalduhzuali, Joint Director (Admin), UD&PA leh Pu Vabeimozachhi Chozah, Under Secretary, UD&PA Department te bakah PHED, I&PR, District Administration hotute leh Joint Village Council aiawh te an tel a ni.

Pr No. 202/2025 (SCP) Dated Serchhip 20th June, 2025
Issued by District Information and Public Relations Officer; Serchhip District, Serchhip.