Press Release Dated Serchhip, the 16th April, 2025

Serchhip District Hospital sak mek dinhmun sawiho

Dated Serchhip, the 16th April, 2025: Vawiin khan Serchhip DC Pu Paul L Khuma hovin Serchhip CMO Conference Room-ah Serchhip District Hospital sak kal mek dinhmun sawihona hun neih a ni.
Serchhip DC Pu Paul L Khuma, District Monitoring Committee Chairman ni bawk chuan hospital mamawhna a san em avangin mi thahnemngaite rawtna angin thutkhawm pawimawh koh a ni, a ti a. Health hmunhma te a that loh chuan hmasawnna kawng dang zawng pawh a nghawng a, a kangkai vak thin a ni tih sawiin DC chuan khawtlang mipuite leh District tan a ni tih thinlung pu theuh turin kalkhawm te a chah a ni.
Serchhip District Hospital building hlui thiatin a thar sak hna thawh mek a ni a. Hetih hun chhung hian Serchhip District Hospital-ah hian nasa taka an inbeng hnuah khum 32 chauh a leng thei a. Aizawl khawpui lama damlo refer an pun phah nasa hle tih Hospital hotute lam atangin ngaihthlak a ni a. Tha tak si a, sak zawh thuai an mamawhna te meeting-ah hian an sawi lang a ni.
Hospital thar sak mek hi block thumah thenin block 2 hi Ministry of DoNER hnuaia North East Special Infrastructure Development Scheme – other than road infrastructure (NESIDS OTRI) atanga sak tura ruahman a ni a. Block 1 erawh Power Grid Corporation of India sum hmanga sak tura ruahmanna hi siam a ni thung. Hospital hlui thiah hna thawh zawh vek a nih hnuah chhan hrang hrang avangin hospital thar sak hna hi mipuite beisei anga chaka a kal duak theih tak loh avangin vawiin hian DC kaihhruaina hnuaiah PWD hotute, Health hotute, contractor te leh tlawmngai pawl te, khawtlang hruaitute inhmukhawmin sawt zawka hnathawh dan tur an sawiho a ni.
PWD Sr EE Project Division III Pu Lalremruata chuan PWD atanga hma an lak dan te leh an kuta a luh dan kimchang taka ngaihthlak a ni a. A sum ngaihtuahtu Health Department aiawhin Joint Director Dr Ruth Lalmuanpuii chuan PGCIL leh NESIDS an dawr dan te leh, harsatna an tawh dan te a sawi a. A sak hna thawktu Zamzo Construction lam aiawh pawhin thu an sawi bawk a ni.
Joint Action Committee aiawhte chuan District Hospital sak zawh a nih theih nan nasa taka tan an lak thu leh an beiseina te, mipui lam atanga mamawhna nasat tawhzia te sawi langin harsatna tam tak awm karah an duh ber chu damlo ten hospital pan tur tha an neih thuai hi a ni thu an sawi a. Kan hma lawkah furpui a lo thlen dawn avangin hnathawh theih hun chhung hian chak taka hma la turin an ngen a ni.
Contractor te leh PWD te inrawnin hun bi neia hna an thawh dan tur work schedule mumal takin a rang thei ang berin siam ni se, tiin meeting chuan a rel a. Mipuite pawhin tawng pawng nawr ngawt lovin, he an work schedule siam hi innghahnaa hmangin, khawtlang pawhin monitoring hi kalpui zawk se, tiin an rel a ni.
Vawiin meeting ah hian sawrkar official te leh contractor te bakah khawtlang hruaitute leh tlawmngai pawl aiawh te an tel a ni.

Pr No. 125/2025 (SCP) Dated Serchhip 16th April, 2025
Issued by District Information and Public Relations Officer; Serchhip District, Serchhip.