Press Release Dated Serchhip, the 11th April, 2025

Serchhipah Village Disaster Management Training buatsaih

Dated Serchhip, the 11th April, 2025: Vawiin khan Village Disaster Management Committee te tan DC Pisapui Hall Serchhip ah Training buatsaih a ni a, Serchhip DC Pu Paul L.Khuma chuan khuallian niin a hmanpui.
Khuallian chuan thusawiin chhiatna thleng thin tam tak hi mihring kan pun zela, kan mamawh a tam zel vang a ni fo, a ti a. Hmasawnna hna kan thawk dawn a nih chuan mawlmang taka tih ngawt hi a him lo a, mithiam zawkte rawn chungin tihdan tur an sawite zawm nachang hriat a ngai a ni, a ti a. Khuarel chhiatna hian nunna hlu tak leh bungraw tam tak a tihchhiat thin avangin himlo tura lang hmalakna a awm chuan khawtlang hruaituten dodal ngam turin kalkhawmte a chah a. Chhiatna a thlen huna chhawmdawlna aiin chhiatna thlenglo thei laka invenna lamah tan kan lak nasat a tul a,chumi atana inrelbawlna tha chu keimahni atang theuha tan a ngai a ni, a ti. Kalkhawmte chu tha taka training a, mahni veng leh khuaahte midang zirtirtu ni thei theuh tura theihtawp chhuah turin a sawm a. VC tin aiawhte hnenah First Aid Box a hlan nghal a ni.
He hun hi Additional DC Pu Lalrinzuala’n a kaihruai a, SDC Dr. Marilyn Lalruatkimi chuan Disaster Introductory & Role of VDMC in Disaster Management chungchang a sawi a. District Hospital-a thawktuten rikrum thila in enkawl dan leh First Aid pek dan tur an zirtir a ni. Serchhip District chhunga VC tin aiawh leh branch YMA aiawhte an tel a ni.

Pr No. 118/2025 (SCP) Dated Serchhip 11th April, 2025
Issued by District Information and Public Relations Officer; Serchhip District, Serchhip.