Press Release (Dated 12th September, 2024)

Serchhip DC Pu Paul L.Khuma hoin Road Protection Squad te an thukhawm

Dated Serchhip, the 12th September, 2024: Vawiin khan Serchhip DC Pu Paul L.Khuma hoin Serchhip DC Meeting Hall-ah Serchhip Road Protection Squad te an thukhawm.

Vantlang kawng te hi mipuiin tangkai taka kan hman tura siam a nih avangin, mipuite kan himna tur leh traffic jam te a awm lohna turin, lirthei veivak te tibuai lo zawng leh mihring kea kalna tura siam pavement-ah te harsatna awm lova kea kalte an veivah theihna turin sawrkar chuan dan a siam a. Kawngpui hnea lirthei leh bungraw dang dahte khap a nih bakah, kawngpui tichhe zawng leh tihnawk zawnga khawsak te, mahni ram neih bak pela kawngpui hnaih taka insak te khap tlat a ni a. Heng danin a khap te bawhchhia an awm leh awm loh enfiah turin Serchhip District Road Protection Squad te hi din an ni a. Hun bi siamin Serchhip khawpui chhunga veng tinah kal kualin an endik thin a. Road Protection Squad ten inspection an neih hnuhnung ber hi May 7, 2024 niin heta an hmalakna te, ruahmanna an lo siam tawh an bawhzui dan te leh hmalak zel dan tur te vawiin meeting-ah hian an sawi ho a ni.

Inspection team te report hi ngaihthlak niin VC area hrang hranga kawngsira motor park te, phalna nei loa bungraw dah te, electric ban sawn ngai leh thildang te sawiho a ni a. Heng zinga a tam zawk hian Inspection Squad te ngenna ngai pawimawhin an insenghawi tawh a, amaherawchu dan zawm lo an la awm tih ngaihthlak a ni a. Heng report a lang sa te bakah a thar enfiah ngai engemawzat a awm thu ngaihthlak a ni bawk.

Kawng sira motor sil chungchang meeting ah hian sawi lan a ni a. School naupang hruaite avanga traffic a harsatna awm te, public transport heng autorickshaw te leh a dang te dinna hmun mumal awm lo chungchang te pawh meeting-ah hian sawiho a ni.

Serchhip District Road Protection Squad te chu member inruat belhin team thumah then ni se, inspection hnuhnung bera an hmalak tawhna te bawhzui pahin endik tur thar lo awm te nen Serchhip khawpui chhung veng hrang hrang a hma thei ang bera fanchhuah leh ni se tiin meeting chuan a rel a. Vantlang kawng chungchanga sawkarin dan a siam te mipuiin kan zawm theihna turin District Magistrate in mipui te hnena hriattirna chhuah ni se, tiin an rel bawk a ni.

Vawiin meeting ah hian Additional DC Pu Lalrinzuala leh official dangte bakah Serchhip khawpui chhung VCP te an tel a ni.

Pr No. 186/2024 (SCP) Dated Serchhip 12th September, 2024
Issued by District Information and Public Relations Officer; Serchhip District, Serchhip.