Press Release (Dated 9th July, 2024)
Serchhip District Disaster Management Authority (DDMA) in khuarel chhiatna tuartu chhungkuate chhawmdawlna hlan.
Dated Serchhip, the 9th July, 2024: Tun hnaia ruahpui nasa tak sur avanga khuarel chhiatna avanga an chhenna atanga inthiar chhuak chhungkaw pasarih (7), Baktawng Chan In a chengte chu nimin July ni 8, 2024 khan Serchhip District Disaster Management Authority chuan tanpuina sumfai an hlan.
DDMA aiawh hian bialtu Zonal Officer Pu Lalhruailiana Zote leh a team ten nimin chawhnu khan Baktawng Chan Inah kalin thil thlen dan te a hmunah an enfiah a. Ni 28th May, 2024 a ruahpui nasa tak sur avang khan leimin nasa tak a thleng a. Chenna in pahnih pawh leimin hian a hnawl bo a ni. Chumi kal zelah chuan, kawng chhak lamah leikhi zau tak takte a insiam bawk a. Chhiatna thlen hlim chhawnah hian verification team te intirin DC Office aiawh official ten vanduaina tawk te hi an lo tlawhchhuak tawh a. Chenna in chhia bakah leimin leh lei tawlh avanga kawng block te leh chhiatna dang thleng te pawh kalchilhin silpaulin leh tanpuina tul dang te pek an lo ni tawh a ni.
Tuna kawng chhak lama lei khi zau tak avang hian Baktawng Chan Inah hian chhungkaw pasarihte chu leimin a awm leh thut theih avangin an chenna in atangin an inthiar chhuak a. Heng harsatna tawk chhungkuate hnenah hian SDRF norms angin Gratuitous Relief (GR) tanpuina sum fai hlan an ni a. Official te hi Village Council member te leh khawtlang hruaituten an lo dawngsawng a. Chhiat tawk te ko khawmin Community Hall-ah chhawmdawlna sumfai inhlanna programme an hmang a. He hunah hian Sorkarin hmalak a tum zelna pawh in hrilhhriat a ni bawk.
Pr No.1117/2024-2025 Dated Serchhip the 9th July, 2024 Issued by District Information & Public Relations Officer, Serchhip District, Serchhip.
