Earthquake Mock Exercise Serchhip ah hlawhtling taka neih a ni

Vawiin hian Disaster Management Authority leh State Disaster Management Authority ten ruahmanna an siam tawh angin Serchhip District Disaster Management Authority chuan Earthquake Mock Exercise Serchhip ah hlawhtling taka neih a ni.

Chawhma dar 10:00 a.m ah chiah siren tiriin lirnghing na takin Serchhip khawpui a sawi anga enchhinna (exercise) hi neih a ni a. Government Serchhip HSS te, vantlang pisa District Education Complex te, sumdawnna hmun Bazar Building te, Damdawiin Serchhip District Hospital Building thenkhatte leh VC Area Hmar Veng ah te lirnghing hian chhiatna hrang hrang a thlen anga changin; Serchhip District Disaster Management Plan, 2017 (DM Plan) in a sawi anga chhanchhuahna hnathawh zui a ni. Lirnghingin khawpui a sawi hnu hian District DM Plan hnuaia Incident Response System in mawhphurhna a pek hrang hrang te chuan District Emergency Operation Centre (DEOC/DC Office) an pan nghal a. DM Plan vekin chhanchhuahna hna thawk tura an ruat sa Rescue Force hrang hrang Police, Fire, Assam Rifle, BSF, YMA Team etc. te pawhin Staging Area (DTO pisa tual) an hmanraw neih te nen pan khawm nghalin Incident Responsible Officer leh Incident Commander ten a tulna hmun apianga an tirh theih turin an inbuiatsaih zui a ni.

Incident Commander hian Staging Area-a chhanchhuahna hna thawk tura inralring nghal te chu chhiatna hmun hrang hrangah a tir chhuak zui nghal a, Planning Section hnuaia Display & Publicity Unit (I&PR) thawk tu te leh Logistic Section hnuaia Communication Unit (MPRO) ten Team hrang hrang te hi tawiawm nghalin chhiatna thlenna hmuna hnathawktu Team hrang hrang te chuan DEOC a Commanding Officer te kaihhruaina hnuaiah chhanchhuahna hna hi an thawk zui nghal a ni.

Vawiin a Serchhip a Earthquake Mock Exercise hi darkar thum (3 hrs) vel neih niin chawhnu dar @ ah DC Conference Hall ah Responsible Officer Pi Sangchhin Chinzah, Bawrhsap ni bawk hovin thlirletna neih zui leh a ni a. He thlirletna ah hian chhiatna hmun hrang hrang a hnathawh te endik tu (Observers) te, chhanchhuahna hnathawktu te viltu(Incident Commander) ten an hnathawh dan an report a. Thuneitu sang zawk atanga lo kal District Observer in a hil hmuh dante a sawi bawk a, chhiatna tak tak a lo thlen palh nia inbuatsaihna tha zawk a awm theihna atana thil pawimawh hrang hrangte sawi ho zui nghal a ni.