Press Release Dated Serchhip, the 6th June, 2025

Serchhip District Planning Committee thukhawm

Dated Serchhip, the 6th June, 2025: Vawiin khan Serchhip District Planning Committee te chu Serchhip DC Pu Paul L Khuma hoin DC Meeting Hall ah an thukhawm.
Meeting-ah hian line department hrang hrang te an tel a. District Adminstration-in heng department tinte hi project thehlut tura a lo hriattir tawh angin chung an thehluh te chu bawhzuiin vawiin agenda atan chhawpchhuah a ni a. Sum awm dan tura beisei zat thlir chungin mamawh hmasa leh ngaih pawimawh zual bik te an thlur bing a, a thehluttu department aiawh ten sawifiahna hun an hmang nghal bawk a ni.
District Planning Committee hi India Constitution Article 275(1) behchhan a din a ni a. Tribal-te dinhmun chawikanna atan sawrkar laipui atangin sum leh pai grant-in-aid lokalin, hmasawnna ruhrel din nan sawrkarin a hmang tangkai thin a ni. Fund te hi tangkai taka hman a nih theih nan District Planning Committee-ah hian department hrang hrang te an tel a. Hmasawnna hna an thawh dan tur rawtna te lakhawmin an thlitfim bakah, a vilzui hna pawh an thawk nghal a ni.
Vawiin meeting hian project ngaih pawimawh zual bik a neih te thurchhuakin DPR mumal taka siam turin Department te a hriattir a. Heng an rawtna te hi DC Office chuan Planning Department pawmpui turin a thehlut dawn a ni.

Pr No. 189/2025 (SCP) Dated Serchhip 6th June, 2025
Issued by District Information and Public Relations Officer; Serchhip District, Serchhip.