Press Release Dated Serchhip, the 5th August, 2025
Serchhip District-ah thawnthu insawisiak buatsaih
Dated Serchhip, the 5th August, 2025: Vawiin khan Serchhip DC Pisapui Hall-ah Serchhip District huap inelna thawnthu insawisiak neih a ni a. He intihsiak hi Tourism Department-in ‘Narrating Mizoram: Tales of Our Land’ tih thupui hmanga ram pum huap thawnthu insawisiak a buatsaih tura Serchhip District aiawhtu tur thlanna a ni.
Khuallian Serchhip DC Pu Paul L Khuma chuan inelna buatsaih a nih chhan sawiin tourist te kan District ah lo kal ta se, engtin nge kan hruai kual anga, engtin nge a hmunhma chanchin kan hrilhfiah ang, tih ngaihtuahna atanga lo piang niin zin mite hipna atana buatsaih a ni, a ti a. Serchhip District chuan State pum huap inelnaah lawmman a lo la fo tawh thin a, vawiina Serchhip District aiawh thlan chhuah te pawh duhsakna hlanin, Serchhip hmel timawitu ni a, lawmman dawng thei tur khawpa inbuatsaih turin a chah a ni. Tlawmngai pawl hrang hrang te chungah lawmthu sawiin Pu Paul L Khuma chuan thawhhona tha tak an neih avanga programme hlawhtling taka buatsaih thei an nih thu a sawi a. District Admintration hi mipui mimirte leh tlawmngai pawlte thlawpna tel lo chuan kenkawh theih a nih lohzia tilangtu a ni, a ti bawk.
Vawiin inelnaah hian mi 5 thlanchhuahte an intihsiak a. Pakhatna lawmman dawngtu chu Lalruattluanga niin lawmman pahnihna dawngtu chu Lalthanzami Chhangte a ni a. A bak mi pathum hnenah consolation prize hlan niin an vai hian Government Serchhip College (GSC) zirlaite an ni. He inelna endiktute hi District Information & Public Relations Officer Pi Lalnunmawii, GSC Assistant Professor Pu K Lalrinchhana leh Government Higher Secondary School Serchhip Lecturer Pu Samuel Saithuamliana te an ni.
Serchhip District Storytelling Competion hi Sub-Headquarters YMA President Pu Kawlthuama’n a kaihruai a. Sub-Headquarters YMA Asst. Secretary Dr Laldinpuia, GSC Asst. Professor chuan report a pe a. SDO (Sadar) Pi Rebecca Laldinmawii Hrahsel chuan lawmthu sawina hun a hmang a ni.
Pr. No. 254/2025 (SCP) Dated Serchhip 5th August, 2025
Issued by District Information and Public Relations Officer; Serchhip District, Serchhip.
