Press Release Dated Serchhip, the 31st July, 2025

Social Welfare Director-in Serchhip Sub-Headquarters YMA Hall thar a hawng

Dated Serchhip, the 31st July, 2025: Social Welfare Director Dr Lalhriatzuali Ralte chuan Serchhip Sub-Headquarters YMA Building zauhna (vertical extension) leh a chhunga Hall thar chu vawiin chawhnua programme buatsaihah a hawng.
Dr Lalhriatzuali Ralte chuan Serchhip Sub-Headquarters YMA ten Hall thar tha tak an nei chu lawmpuiin daihzai leh tangkai takin sum an hmang a, a hlawhtlinna atana thawktu zawng zawngte an fakawm hle a ni, a ti. Kohhran, YMA leh sawrkar thawhhonaa ruihhlo ngaite enkawlna Hulhliap chungchang sawiin a hlawhtlinna tura YMA te tangkaizia a sawi a, an tel loin a hlawhtling dawn lo tih sawrkarin a hmu chiang hle a ni, a ti. Mizoram siamtha tura Social Welfare Department hmalakna leh hmachhawp hrang hrangte Director hian a sawi bawk a. Serchhip Sub Headquarters YMA ten ruihhlo dona atana an hman tur, Social Welfare Department hmingin cheng 10,000 a hlan bawk a ni.
Central YMA President Pu Lalhmachhuana pawhin Building thar an neih chungchangah Serchhip Sub-Headquarters YMA a lawmpui thu leh hma an sawnzia ti langtu a ni tih a sawi a. Raltlan chungchangah fimkhur a ngaihzia sawiin, ruihhlo do kawngah tan lak a ngai a, theihtawp chhuah turin YMA member te a sawm a ni.
Serchhip Sub-Headquarters YMA Building zauhna vertical extension hi cheng nuai 98 sengin kum 2023, August ni 7 khan sak tan a ni a. Khatih hunlaia Social Welfare & Tribal Affairs Minister Er. Lalrinawma’n Serchhip Sub-Headquarters YMA te dilna pawmsakin, India Danpui Article 275 (1) hnuaia Tribal mite tana hmasawnna sum Grant-in-Aid a pek hmangin sak a ni a; kumin May ni 16 khan sak zawh a ni. A chhungah hian Hall tha tak awmin Sound System tha tawk tak dah a ni bawk.
Serchhip Sub-Headquarters YMA Building hi kum 2015, March ni 5 khan khatih hunlaia Mizoram Chief Minister Pu Lal Thanhawla’n a lo hawng tawh a. MP (Lok Sabha) fund atanga sak niin tunah hian Grant-in-Aid hmangin a sang zawnga sak chhunzawm leh tihlen a ni.
Serchhip Sub-Headquarters YMA hnuaiah hian YMA Group 3 – Vantawng, Tawi Tlang leh Tuichangral South Group YMA te an awm a. YMA Branch hrang hrang 74 awmin Serchhip town area chhungah bik branch 21 an awm mek a ni.
Hawnna inkhawm hi Serchhip Sub-Headquarters YMA President Pu Kawlthuama’n a kaihruai a. Serchhhip Additional DC Pu Lalrinzuala pawhin lawmpuina thu a sawi a. Serchhip Sub-Headquarters YMA Secretary Pu Zonunsanga Kawlni leh Finance Secretary Pu H Lalbiakhlua ten an sum dinhmun leh hmalakna hrang hrang te an report a. Serchhip SP Pu Gavit Gogna bakah Serchhip District chhunga sawrkar hotute, Central YMA hruaitute, khawtlang hruaitute leh tlawmngai pawl hrang hrang hruaitute he hunah hian an tel a ni.

Pr. No. 247/2025 (SCP) Dated Serchhip 31st July, 2025
Issued by District Information and Public Relations Officer; Serchhip District, Serchhip.