Press Release Dated Serchhip, the 2nd June, 2025

Serchhip District a chhiatna thleng chungchang sawiho

Dated Serchhip, the 2nd June, 2025: Vawiin khan Serchhip DC hoin Serchhip District chhunga thli leh ruahpuiin a tihchhiat hrang hrangte thlirhona leh hmalak zui dan tur an rel a. He meeting hi Serchhip DC Meeting Hall ah neih niin leimin vanga in chhia (fully damaged) chhungkaw 8 te hnenah Disaster Relief Fund atangin sum Rs.1,30,000 theuh sem nghal a ni.
DC Pu Paul L Khuma chuan Serchhip District chhunga khuarel chhiatna rapthlak tak thlengah sawrkar official te bakah khawtlang hruaitute, tlawmngai pawl te leh mipuite thawhhona tha tak avangin lawmthu a sawi a. Ruah leh leiminin mihring nunna hial lain chhiatna nasat tak a thlen a, ngai awh leh thei turin sawrkar leh mipuite kan tan tlan zel a ngai a ni, a ti.
SP Pu Gavit Gogna chuan Serchhip police te hmalakna sawiin traffic buapui kawngah te, thihna thleng chungchangah te, sawrkar leh mipui mamawhna apianga an kal thu leh an inhawn reng thu a sawi a. Police in thil thlen dan report an lakkhawm te vawiin hian tarlangin hriat theih chinah in chhia (fully damaged) -15, partially damaged – 20 (appx.) a awm a. Lirthei chhia hi Govt Serchhip College Bus, maruti 800, Tata LGV, Scooty, Sumo leh scorpio te a chhia a. Serchipah hian mahni chenna in chhuahsan ngai chhungkaw 23 vel an awm tawh a ni.
Vawiin meeting-ah hian department hrang hrang ten report pe in kawlphetha, tui leh inkalpawhna kawng chungchanga District dinhmun ngaihthlak a ni a. Inkalpawhna kawng chungchangah Serchhip leh Thenzawl inkar chu vawiin hian lirthei zawng zawng paltlang theiha thenfai beisei a ni a, thingtlang khaw kar kawng pawh a tam zawk chu thenfai hman beisei a nih thu Sr.EE PWD chuan a sawi a. NHIDCL hotuten Serchhip by-pass road chu zanina lirthei paltlang thei tura thenfai hman tumin theih tawp an chhuah tih an sawi bawk.
Eng pek kawngah harsatna an tawh dan Sr. EE, P&E chuan sawiin thir ban, LT leh HT ban leh hrui, 32 kv line chat leh tlu a tam a, tuna eng an pek theih chin bak pek belh tumin tan an la mek a, New Serchhip LT ban tlu siam mek niin a that veleh damdawi in chhim lam Sailiam thleng eng pek theih a nih tur thu a sawi. Thenzawlah May ni 30 atangin eng pek theih a ni tawh lo a. Rei tak an zawn hnuah tukin zing dar 3 ah Thenzawl line hi thing tlu in a vaw chhia tih an hmuh chhuah thu leh line thara pawh dan ngaihtuahin a rang thei ang bera eng pek tumin tan an la tih a sawi a ni.
Tui chungchangah tuilianin PHE pump khawl leh line tam tak a tichhia a, a chim pil bawk avangin harsatna an tawk a. Serchhip a hman tur tui hi ni hnih pump theih a ni tawh lo tih Sr. EE PHE chuan a sawi a. 11kv powerline chu vawiinah siam zawh hman an inbeisei thu leh tui pump pawh chhunzawm theih thuai an inbeisei thu a sawi a. Ruahsur leh tui lianin a la tihbuai avangin thingtlang lam atangin WATSAN ten harsatna an tawh dan kim chang an la hriat theih loh thu a sawi bawk.
Zawlpui leilet chu tuilianin nasa takin a chim a, inkalpawhna kawng leh lei te a ti chhe bawk a. Agriculture leh Horticulture hotute chuan report kimchang hriat a la nih loh thu sawiin khaw hrang hrang atangin report a luh mek thu leh zirchianna neih hmabak a la nih thu an sawi a ni.

Pr No. 186/2025 (SCP) Dated Serchhip 2nd June, 2025
Issued by District Information and Public Relations Officer; Serchhip District, Serchhip.