Press Release Dated Serchhip, the 29th July, 2025

Serchhipah NCORD meeting neih a ni

Dated Serchhip, the 29th July, 2025: Vawiin khan Serchhip DC Pu Paul L Khuma hoin Serchhip DC Meeting Hall-ah NCORD meeting neih a ni a. Serchhip District-a ruihhlo do kawnga hmalakna report ngaihthlak a nih bakah, hmalak chhunzawm zel dan tur an rel.
Member ten an hmalakna hrang hrang an report a. SP Pu Gavit Gogna chuan an hmalakna sawiin meeting leh meeting inkarah case 1 neiin Heroin Gram 14 an man a. July 11, 2025 khan Serchhip Police station ruihhlo man te hal niin heroin gm 178, ganja kg 2.92 leh meth kg 3.88 hal ral a ni a. Heng ruihhlo halral hlut zawng hi cheng nuai 55.88 a ni.
Excise & Narcotics Department hian case 8 an ziak lut tih an report a. School Education lam chuan school 53 ah naupang te bag an endik (surprise check) thin thu te, awareness campaign an neih thin thu an sawi bakah, August thla atangin an curriculum ah telhin ngawrh zawka ruihhlo that lohzia inzirtir an tum tih meeting-ah hian an sawi. Health Department hian Hmuntha, Chhiahtlang leh Chhingchhipa damdawi dawr hrang hrang an endik a. Drug license in a huam phak loh damdawi zuar ru an awm em tih an endik a ni.
Tun hnaiah Serchhip Police ten Sailiamah fertilizer tawlh ru an man a. Agriculture Department kutah dah niin dan angin hma an la chhunzawm dawn a ni.
Vawiin NCORD meeting-ah hian Serchhip SP Pu Gavit Gogna bakah Health Department, Excise & Narcotics, Assam Rifles, Agriculture, School Education Department te an tel a ni.

Pr. No. 245/2025 (SCP) Dated Serchhip 29th July, 2025
Issued by District Information and Public Relations Officer; Serchhip District, Serchhip.