Press Release Dated Serchhip, the 28th May, 2025

Serchhip DC Pu Paul L Khuma hoin NCORD an thukhawm

Dated Serchhip, the 28th May, 2025:Vawiin khan Serchhip District Narco Coordination Center (NCORD) chu an Chairman Pu Paul L Khuma, Serchhip DC leh Member Secretary Pu Gavit Gogna, Serchhip SP hoin Serchhip DC Meeting Hall-ah an thukhawm.

Meeting hmasa April 23 leh vawiin meeting inkara an hmalakna hrang hrang te ngaihthlak a ni a. Dan-in a phut angin Serchhip District chhunga Scheduled H, H1 leh X damdawi license nei ten an dawrah CCTV an vuah theuh tawh a. Serchhip Police te chuan ND&PS Act hnuaiah case 1 an nei a, Excise and Narcotics Department chuan case 3 an ziaklut thung a. Meeting hmasa leh tun inkarah mi pali man an ni.

Drugs Awareness campaign hi school hrang hrangah neih mek niin DEO leh a thawhpuiten fehchhuakin Serchhip District khaw hrang hrangah campaign an nei mek a. MSACS leh DEO office tangkawp chuan awareness campaign peng pakhat atan High School leh Higher Secondary School ah sports an buatsaih bawk.

Food and Drug Administration hotute, YMA leh police te tangkawpin Serchhip khaw chhunga damdawi dawr hrang hrangah zawrh phal loh zuar an awm em tih endik turin Joint Raid neih ni se tiin vawiin meeting hian a rel a. An fehchhuah dan tur leh a hun chungchangah calendar siam thuai ni se, an ti a ni.

Vawiin meeting ah hian Serchhip CJM, Excise & Narcotics, police, Sub Headquarters YMA, Health Department hnuaia Food and Drugs Administration te an tel a. Heng bakah hian taxi, sumo leh two-wheeler taxi driver te koh niin danin a phal loh thil phurh chungchang leh a hrem theihna dan te an hriattir a ni.

Pr No. 177/2025 (SCP) Dated Serchhip 28th May, 2025
Issued by District Information and Public Relations Officer; Serchhip District, Serchhip.